Тошкентда кореялик мутахассислар иштирокида семинар ўтказилди

Республика спорт тиббиёти илмий-амалий маркази ташаббуси билан Миллий олимпия қўмитасида жанубий кореялик профессорлар иштирокида спорт тиббиёти бўйича амалий семинар ташкил этилди. Жанубий Кореянинг «Чонг Ён» клиникаси  иштирокидаги ушбу тадбирда Республика спорт тиббиёти илмий-амалий маркази мутахассислари билан бир қаторда Тошкент тиббиёт академияси профессор-ўқитувчилари, магистр ва клиник ординаторлари ҳамда талабалари ҳам қатнашдилар. 

— Спортни ривожлантириш йўлида спорт тиббиётининг аҳамияти беқиёс, - дейди семинарнинг очилиш маросимида иштирок этган тиббиёт маркази директори, тиббиёт фанлари доктори, профессор Абдушукур Содиқов. — Спортчининг мусобақага жисмоний томонлама тайёр бўлиши ва тикланишида спорт тиббиёти муҳим ўрин тутади. Шу сабабдан, Ўзбекистонда ҳам мазкур йўналишни ривожлантириш бўйича талайгина ишлар амалга оширилмоқда. Ушбу семинар ҳам бу йўлда навбатдаги қадам бўлди, дейишимиз мумкин. 

Семинарда нутқ сўзлаган Жанубий Кореядан ташриф буюрган профессор Пак Жон Син спорт тиббиёти соҳасидаги янги ютуқлар, уларни амалга ошириш механизмлари, касалликларни халқ табобати ёрдамида даволаш ҳақида маҳорат дарслари ўтиб, маъруза қилди. Буни амалиётда ҳам кўрсатиб беришди. Бундан ташқари, семинар қатнашчилари ўзларини қизиқтирган саволларга жавоб олишди. 

Албатта, спортчининг муваффақиятга эришишида унинг соғломлиги, мусобақага тайёргарлик кўриши, машғулотлардан сўнг тикланиш жараёнларини тўғри ташкил қилиш катта аҳамиятга эга. Мамлакатимизда бундай амалий семинарлар ташкил этилиши эса спорт ривожига ўз ҳиссасини қўшиши, шубҳасиз.