Уайлдер ва Бризил иштирокида сўнгги матбуот анжумани ўтказилди

Хабарингиз бор, 18 май (Тошкентда 19 май тонги) куни ўтказиладиган бокс кечасининг марказий жанги супероғир вазн тоифасида WBC чемпиони Деонтей Уайлдер ҳамда расмий даъвогар Доминик Бризил ўртасида бўлиб ўтади. 

"Менга қарши рингга чиқадиган боксчиларнинг бари энг яхши спорт формасида экани, мени мағлуб этишларини айтишади. Лекин якунда бу режалар амалга ошмай қолаверади. Бу сафар ҳам шундай бўлиши керак. Доминик мендан жанг сўради ва мен унинг истагини амалга оширдим. Энди мендан хафа бўлмасин. 18 май оқшоми мен учун қувончли, Бризилга жуда ҳам қайғули бўлади", - деди Уайлдер.

"Мен жангга ҳар томонлама пухта тайёргарлик кўрдим. Вержил Хантер ёрдамида режа асосидаги кучли машғулотларни ўтказдик. Жисмонан ва руҳан ўзимни кучли ҳис қиляпман. WBС камарини қўлга киритиш бу менинг олий мақсадим. Уайлдер қандай жангга рози бўлиб қолганини ҳалигача тушунмаяпти. У шанба куни фаолиятидаги энг қийин жангини ўтказади. Мен Деонтейни чунонам дўппослайман, бунинг натижасида у қўлқопларини бошқа кийишга ўзида журъат топа олмайди", - деди Бризил.