Уимблдон. Зверев 2:0 ҳисобидаги устунликдан фойдала олмади

Дунёнинг тўртинчи ракеткаси Александр Зверев мусобақадаги иштирокини якунлади. Германиялик теннисчи 1/8 финалда ATP рейтингида 12-ўринни эгаллаб турган америкалик Тэйлор Фритцга беш сет натижасига кўра имкониятни бой бериб қўйди - 6/4, 7/6(4), 4/6, 6/7(3), 3/6.

Ваҳоланки, олмон теннисчиси сетлар бўйича 2:0 ҳисобида олдинга чиқиб олганди. У бу катта устунликдан фойдалана билмади. Ўзаро учрашувларда ортда қолаётган америкалик теннисчи фарқни минимал даражага олиб келди - 4:5.

Уч соату 29 дақиқа давом этган баҳсда Зверев 19, Фритц 15 та эйс зарбасини амалга оширган. Тэйлор фаолиятида иккинчи бор Уимблдон турнирининг 1/4 финалида ўйнайди.