Оқ уйдаги UFC жанглари расмий рекордга киритилмаслиги мумкин

Дунёнинг энг кучли Лигаси ҳисобланган UFC ушбу турнирни ўтказишда Колумбия округи Атлетик комиссияси билан ҳамкорлик қилмоқчи эмас, чунки тартибга солувчи орган "федерал ер"да юрисдикцияга эга эмас. Бу жанг натижаларининг тадбир иштирокчиларининг расмий профессионал рекордига киритилмаслигига олиб келиши мумкин.

Бу ҳақда Атлетик комиссия раҳбари Эндрю Хаф "Washington Post" нашрига берган интервьюсида маълум қилди.

"Биз ушбу тадбир ўтказилиши ҳақида ҳеч нарса билмаймиз. Колумбия округидаги ҳар бир промоутер бир хил стандартларга риоя қилиши керак - у кичик кураш шоусини ёки йирик тадбирни ўтказишидан қатъи назар. Мени вазият ҳавотирга солмоқда. Агар кимдир "Малколм Х" боғида бокс жангини ўтказишга қарор қилса, нима бўлади? Демак, улар ҳам бизга мурожаат қилишлари шарт бўлмай қоладими?", - деди Хафф.

Хаффнинг сўзларига кўра, тегишли рухсатсиз жанглар Колумбия округи Атлетик комиссияси томонидан рухсат этилмаган деб ҳисобланади, чунки комиссия жангчилар, менежерлар ва промоутерлардан тадбирларни ўтказишдан олдин лицензия олишни талаб қилади, UFC эса буни режалаштирмаяпти.

Лига аллақачон шоуни, жумладан, барча тегишли тадбирларни, жумладан, вазн ўлчаш маросими, тиббий кўриклар, шунингдек, допингга текширувни мустақил равишда ўтказмоқчи эканини маълум қилди.