UzChess Cup III. Мадаминовда тўртинчи ғалаба, уч ўзбек йигити Топ-3`таликда!

Учинчи бор ташкил этилаётган UzChess Cup III мусобақаси “Masters”, “Challengers” ва “Futures” гуруҳларида ўтказилмоқда. Бош соврин учун дунёнинг кўзга кўринган гроссмейстерлари баҳс олиб боряпти. 

Тўққиз турдан иборат классик шахмат мусобақасининг кашфиётига айланган Муҳиддин Мадаминов кетма-кет иккинчи, мусобақадаги тўртинчи ғалабасини қўлга киритди. Бу сафар у ҳиндистонлик гроссмейстер Видит Сантош Гужратҳини таслим эта олди. “Masters” гуруҳидаги қолган уч гроссмейстеримиз 6-турда рақиблари билан дуранг ўйнашди. 

Шамсиддин Воҳидов ўзбек дербисида Нодирбек Якуббоев билан муросага келди. Нодирбек Абдусатторов қора доналарда америкалик Ҳанс Мок Ниеманн билан очколарни бўлишиб олди. Россиялик Ян Непомняший омадсизликлардан кейин ниҳоят бу турда ҳиндистонлик Аржун Эригаисини мағлубиятга учратди. Грециялик Николас Теодору блиц бўйича жаҳон чемпиони озарбайжонлик Шахрияр Мамедьяровга ютқазиб қўйди.  

Олтинчи турдан кейин турнир жадвалида Шамсиддин Воҳидов ва Муҳиддин Мадаминов 4 очкодан жамғариб, қўшҳоким бўлиб олишди. Нодирбек Абдусатторов 3,5 очко билан соф учинчи ўринни банд этган. Аржун Эригаиси, Ҳанс Ниеманн, Шахрияр Мамедьяров, Ян Непомняший, Нодирбек Якуббоев ҳисобида 3 очкодан бор. Николас Теодору 2 очко билан 9-поғонадан жой олган бўлса, Видит Сантош 1,5 очко жамғарган ҳолда сўнгги ўринни банд этган. 

Бугун 7-турда бизни ажойиб ўзбек дербиси кутиб турибди - Нодирбек Абдусатторов Жавоҳир Синдаровнинг секундант-мураббийи Муҳиддин Мадаминовга қарши! Шамсиддин Воҳидов қора доналарда Шахрияр Мамедьяров билан ўйнаса, Нодирбек Якуббоев оқ доналарда Ян Непомняшийга қарши баҳс олиб боради. 

Маълумот учун, "Masters" турнири чемпиони 20 000, “Challengers” гуруҳи ғолиби 6 000, “Futures”да бош совринга эга чиққан шахматчи эса 4 000 АҚШ доллари миқдорида мукофот пулини қўлга киритади. "Masters" турнирида иккинчи ўрин эгаси 15 000, совринли учинчи поғонадан жой олган шахматчи 10 000 доллар билан тақдирланади.