Вен Жун рапидда ҳам жаҳон чемпиони, Тоҳиржоновачи?

Умумий мукофот жамғармаси 1 150 000 АҚШ долларини ташкил қилувчи жаҳон чемпионатининг рапид йўналишида кеча бир нечта тур учрашувлари ўтказилди ҳамда ғолиб ва совриндорлар номи маълум бўлди. Баҳсларда ягона вакиламиз халқаро аёллар гроссмейстери Гулруҳбегим Тоҳиржонова ҳам иштирок этди. 

Тоҳиржонова сўнгги 12-турда оқ доналарда ҳаракат қилди ва россиялик рақибаси Екатерина Кабановани мағлубиятга учратди. Ушбу ғалабадан сўнг шахматчимиз 12 имкониятдан 7 очко жамғарди ва жаҳон чемпионатининг рапид баҳсларини қўшимча кўрсаткичларга кўра 34-ўринда якунлади. 26-поғонадаги россиялик Евгения Овод ҳам Гулруҳбегим сингари 7 очко жамғарди. 

Ўн икки имкониятдан 10 очко жамғарган хитойлик халқаро гроссмейстер, амалдаги жаҳон чемпиони Жу Вен Жун рапид, яъни тезкор шахмат бўйича ҳам жаҳон чемпионлик унвонини расмийлаштирди. Тоҳиржонова бир ой олдин ўтказилган жаҳон чемпионатининг чорак финалида айнан Вен Жунга тай-брекда имкониятни бой берган эди. 

Пешқадамдан бир очкога ортда қолиб кетган эронлик Сарасадат Хадемалшарьех ва россиялик Александра Горячкина кучли учликдан жой олишди.