Виталий Кличко укаси ҳақида: "Ҳозир у зўр спорт формада"

"Ўйлашимча, у ҳеч кимга ниманидир исботлаши шартмас. У бокс тарихига энг кучли боксчи сифатида кирган. Фаолиятини қайта тиклаш масаласини фақатгина ўзи ҳал қилади. Лекин, ҳаётда асосийси пул эмас, балки соғлиқ эканлигини унутмаслиги лозим. Владимир қандай қарор қабул қилса ҳам, мен уни доимгидек қўллаб тураман".

"Укангиз пул учун қайтмоқдами?" деган саволга Кличколарнинг каттаси қуйидагича жавоб қайтарди:

"Ўйлашимча Владимирга пул муҳим эмас, сабаби у фаолияти давомида кўп пул ишлаб топди. Фаолиятини якунлаганидан сўнг ҳам бизнесда яхши фаолият олиб бормоқда".

Шунингдек, Виталий DAZN Владимирга шартнома таклиф қилгандан сўнг нима ҳақида гаплашганини ҳам айтди.

"DAZN Владимирга 40 миллион долларлик шартнома таклиф қилганидан сўнг мен унга қўнгироқ қилдим. Ўшанда укам бу шартнома менга умуман қизиқ эмас деганди. Кейин DAZN 80 миллионлик шартнома таклиф қилганда яна гаплашдик. Бу таклиф ҳам қизиқ эмас, балки 100 миллионлик шартнома таклиф қилишса ўйлаб кўрардим деганди".

Виталий Кличко укасининг ҳозирги спорт формаси ҳақида ҳам фикр билдирди.

"Агар у футболкасини ечса, сиз унинг қандай ажойиб формада эканлигини кўрасиз. У ҳар куни машғулот ўтказади. Ажабланарли кўриниши мумкин, лекин у ажойиб жисмоний ҳолатини сақлаб қолган", - деди катта Кличко.