Воҳидов Англиядаги турнирда якка пешқадам бўлиб олди

Hastings International Chess Congress фестивалининг энг асосий турнирида 24 давлатдан 84 нафар шахматчи иштирок этяпти. Улар орасида ҳамюртимиз Жаҳонгир Воҳидов (2500) ҳам бор. Мастерс турнири швейцарча тизимда 9 партиядан иборат бўлади.

Эътиборлиси, самарқандлик халқаро гроссмейстер 7-турдан сўнг турнир жадвалида 6 очко билан якка пешқадам бўлиб олди. Воҳидов 7та учрашувдан 5тасида ғалаба қозониб, икки партияда дуранг натижа қайд этган.

Кеча ўтказилган 7-турда Жаҳонгир оқ доналарда ўйнаб, англиялик Даниэл Гормалли (2477)ни мағлубиятга учратди. Ҳамюртимиз турнирда тўртинчи рақам остида таснифланган.

Бугун Воҳидов мусобақанинг биринчи рақамли шахматчиси ҳиндистонлик Дип Сенгупта (2586)га қарши қора доналарда ҳаракат қилади. Сенгупта 5 очко билан учинчи ўринни эгаллаб турибди. Иккинчи поғонадан жой олган хитойлик Йипинг Лоу (2462) ҳисобида 5,5 очко бор.