FIDE Freestyle Chess Жаҳон чемпионати. Бугун Абдусатторов финал йўлланмаси учун Магнус Карлсен билан ўйнайди

Ушбу мусобақада ҳамюртларимиз Нодирбек Абдусатторов ва Жавоҳир Синдаров ҳам иштирок этмоқда.

Кеча мусобақанинг саралаш баҳслари бўлиб ўтди.

8 нафар шахматчи ўзаро ўйинлар ўтказишди. 7 та тур якунига кўра, ҳамюртимиз Нодирбек Абдусатторов 4 очко жамғариб, кучли тўртликка кирди ва ярим финал йўлланмасини қўлга киритди. Жавоҳир Синдаров эса 3 очко билан 7-ўриндан жой олди.

Энди бугун Абдусатторов ярим финалда норвегиялик Магнус Карлсенга қарши баҳс олиб боради. Иккинчи ярим финал жуфтлигида эса Винсент Кеймер ва Фабиано Каруана ўзаро ҳисоб-китоб қилади.

Жавоҳир Синдаров ўтиш ўйинида қатнашади. У иштирокини ҳиндистонлик Аржун Эригаисига қарши ўйин билан бошлайди.