Total Chess. Абдусатторов иккинчи кун Фирузджага қарши иккита партия ўтказди

Уч хил вақт назорати, 24 нафар иштирокчи 11 кун давомида Total Chess World Championship Tour бош соврини учун баҳс олиб боради. Мусобақанинг илк куни омадсизлкка учраб, ўтказилган блиц баҳсларида 9 та турда фақат қозоғистонлик аёл шахматчи Бибисара Ассаубаевани мағлубиятга учратган Нодирбек Абдусатторов иккинчи кун ҳам кўнгилдагидек натижа кўрсата олмади. 

Гроссмейстерлар 4 та гуруҳга бўлиниб, Fast Classic форматида курашга киришишди. Беш кун давом этадиган баҳсларда гуруҳ босқичидаги ғалаба учун 3, дуранг учун эса 1 очко берилади. Нодирбек биринчи кун франциялик Алиреза Фирузджага қарши иккита партия ўтказди. Қора доналарда мағлубятга учраган ҳамюртимиз оқ доналарда устунликка эга бўлса-да, якунда дуранг билан кифояланди. Бир очкога эга Абдусатторов гуруҳда сўнгги олтинчи ўринни эгаллаб турибди.   

Мусобақа формати:

Fast Classic — 45 дақиқа + ҳар юришга 30 сония

Rapid — 15 дақиқа + 10 сония

Blits — 3 дақиқа + 2 сония

Гуруҳ босқичи беш кун давом этади. 17 ноябрдан плей-офф баҳслари бошланади. Унда шахматчилар бир-бирига қарши блиц, рапид ва Fast Classic форматларида ўйнайди. Мусобақа 20 ноябрь куни якунланади.

Мусобақанинг умумий мукофот жамғармаси — 650 000 АҚШ доллари. Турнир ғолиби 80 000 долларни қўлга киритади. 2027 йилда расман йўлга қўйиладиган Total Chess жаҳон чемпионати турининг илк синови айнан Будапештда бўлиб ўтади.