Хави Ўзбекистонга келиши мумкин, "Насаф" ОЧЛ гуруҳ босқичида ўйнайдиган бўлди

"Аждарлар" бугун Қаршидаги "Марказий" стадионда Иорданиянинг "Ал Файсали" жамоасига қарши ўйин ўтказди. 

Мезбонларнинг тўлиқ устунлиги остида кечган ўйинда ўзбек жамоаси 5:1 ҳисобида ғалаба қозонди ва Осиё чемпионлар лигасининг гуруҳ босқичига йўлланма олди. 

Ўйинга тўхталадиган бўлсак, баҳс "Насаф"нинг устунлиги остида бошланди. Бу эса ўз самарасини бермай қолмади. Учрашувнинг 12-дақиқасида Игорь Голбан бурчакдан етказиб берилган зарбани боши билан голга айландира олди. Иккинчи гол ҳам биринчисига ўхшаш бўлди. 49-дақиқада Жасур Ҳасановнинг бурчакдан оширган тўпини кечагина Осиё чемпионатидан қайтиб, жамоа сафига қўшилган Бобир Абдиҳолиқов боши билан рақиб дарвозасини ишғол этди. Орадан уч дақиқа ўтиб, 52-дақиқа ўтиб бораётган бир пайтда Азизжон Ғаниев ажойиб зарба эвазига орадаги фарқни йириклаштирди. 61-дақиқада рақиб футболчилари жарима майдончаси ичида Ислом Кенжабоевга нисбатан ўйин қоидасини буздилар. Пенальтидан эса Драган Черан унумли фойдаланди ва ҳисобни 4:0 кўринишига олиб келди. 86-дақиқада эса рақиб футболчиси тўпни ўз дарвозасига киритиб, автогол муаллифига айланди. Қўшиб берилган дақиқаларда эса меҳмонлар футболчиси Албан Меҳан гол киритиб, ҳисобни бироз қисқартирди.

Ушбу ғалаба "Насаф"га Осиё чемпионлар лигасининг гуруҳ босқичида иштирок этиш имкониятини тақдим этди. 

Жамоамиз энди "С" гуруҳидаги ўйинларда иштирок этади. Ушбу гуруҳдан "Персиполис" (Эрон), "Ал Садд" (Қатар), "Ал Васл" (БАА) жамоалари ўрин олган. 

Қатарнинг "Ал Садд" жамоаси таркибида испаниялик футболчи, "Барселона"нинг собиқ аъзоси Хави тўп тепади. У "Насаф"га қарши бўладиган ўйинда юртимизга ташриф буюриши мумкин.