Японияда ишлаётган ўзбекистонлик мутахассис: "Олимпиадада мезбон жамоани бошқариш менга қўшимча куч беради"

"Дарҳақиқат, мен ҳозирда Япония терма жамоасининг бош мураббийи ҳисобланаман. Японияликлар билан ишлаётганимга олти ойдан ошди. Умуман олганда, японларни ўзбек боксчиларидан бир нечта фарқи бор. Умид қиламанки, терма жамоани Олимпия ўйинларига яхши тайёрлаб, мусобақада муносиб иштирокларини таъминлай оламиз.

Олимпиадада мезбон терма жамоани бошқариш жуда ҳам маъсулиятли иш. Бундан ташқари, бу менга катта хоҳиш беради, сабаби 60 ёшга кирдим, менга шу ёшимда ҳам ишонишмоқда ва ҳали кераклигимни англашга ҳисса қўшади, менга қўшимча куч беради.

Умуман олганда, Япония ўз уйида ташкил этиладиган Олимпия ўйинларига барча спорт турлари бўйича жуда жиддий тайёргарлик кўрмоқда. Олимпия маркази бор. У ерда барча терма жамоалар шуғулланишлари учун шароитлар мавжуд. Турар жой, витамин, озиқ-овқат, машғулотлар ўтказадиган зал барчаси мавжуд. Мен жамоам билан ҳам айнан шу марказда машғулот ўтказаман", - деди Владимир Шин.