Ёқуббоев икки карра Ўзбекистон чемпиони, шохсупада 100 фоиз ёшлар!

Айлана тарзда ўтказилган мусобақада 5 нафар халқаро гроссмейстер - Нодирбек Абдусатторов (2550, чемпионатнинг биринчи рақамли иштирокчиси), Сайдали Йўлдошев (2469), Марат Жумаев (2451), Алексей Барсов (2411) ва Тохир Воҳидов (2400) дона сурган бўлсада, якунда шохсупадан ёшлар ўрин эгаллашди. 

Сўнгги ўн учинчи турда 16 ёшли шахматчи чемпионат пешқадами Нодирбек Ёқуббоев партия ўтказмай туриб ғалабага эришди. Унинг рақиби дунёнинг энг ёш иккинчи гроссмейстери Нодирбек Абдусатторов бетоб бўлиб қолганлиги сабабли учрашувни ўтказа олмади. Натижада Ёқуббоевга техник ғалаба ёзилди. 

Ўн уч имкониятдан 9,5 очко жамғарган Ёқуббоев Ўзбекистон чемпионига айланди. Нодирбек 2016 йилда ҳам мамлакат чемпиони бўлган эди. Йигирма олти ёшга тўлган Никита Хорошев 9 очко билан кумуш, 13 ёшли Жавоҳир Синдаров 8,5 очко билан бронза медалига сазовор бўлди. Шохсупага тажрибали гроссмейстерларни ортда қолдирган ёш шахматчиларнинг кўтарилгани эътиборга молик ҳолат.