Ёш гроссмейстеримиз Англиядаги турнирда пешқадамлик қиляпти

Hastings International Chess Congress фестивалининг энг асосий турнирида 24 давлатдан 84 нафар шахматчи иштирок этяпти. Улар орасида ҳамюртимиз Жаҳонгир Воҳидов (2500) ҳам бор. Мастерс турнири швейцарча тизимда 9 партиядан иборат бўлади.

Эътиборлиси, самарқандлик халқаро гроссмейстер 6-турдан сўнг турнир жадвалида 5 очко билан пешқадамлик қиляпти. Воҳидов 6та учрашувдан 4тасида ғалаба қозониб, икки партияда дуранг натижа қайд этди.

Кеча ўтказилган 6-турда Жаҳонгир қора доналарда ўйнаб, хитойлик Йипинг Лоу (2462) билан муросага келди. Ҳамюртимиз турнирда тўртинчи рақам остида таснифланган. Унинг ҳисобида 5 очко бор. Айнан шунча очкога англиялик гроссмейстер Даниэл Гормалли (2477) ҳам эга бўлиб турибди.

Эътиборлиси, бугун ҳар икки гроссмейстер биринчи доскада ўзаро тўқнаш келишади. Ғолиб шахматчи якунда чемпион бўлиш имкониятини ошириб олади.