Ёш шахматчиларимиз Хитойда ўтган Осиё чемпионатида 18 медални қўлга киритди

Нуфузли мусобақанинг стандарт шахмат бўйича 11 ёшгача қизлар ўртасидаги баҳсларида Умида Омонова 8 очко билан биринчи ўринни эгаллаб, Осиё чемпиони бўлди. У блиц шахмат бўйича ўтказилган баҳсларда ҳам 8 очко билан олтин медални қўлга киритиб, рапид йўналишида 5,5 очко жамғарган ҳолда кумуш медаль билан тақдирланди.

Ушбу ёш тоифасидаги ўғил болалар баҳсида Олмос Раҳматуллаев 7,5 очко билан иккинчи ўринни эгаллади. Рапид ва блиц йўналишларида эса тенгсиз эканини исботлаб, шоҳсупанинг энг юқори поғонасига кўтарилди.

Етти ёшгача қизлар баҳсида қатнашган Афрўзабону Рўзиматова 7 очко билан кумуш медални қўлга киритди. Унинг блиц йўналишидаги иштироки эса ғалаба билан якунланди – 7 очко ва олтин медаль. Рапид йўналишида 5,5 очко билан иккинчи бўлди.

Ўн беш ёшгача қизлар мусобақасида Ситора Сапарова стандарт шахмат бўйича учинчи ўринни эгаллади. Блиц йўналишида 9 имкониятдан 9 очко, рапид йўналишида етти имкониятдан 6,5 очко жамғариб, шоҳсупанинг энг юқори поғонасида кўтарилди.

Ўн уч ёшгача қизлар баҳсида яна бир шахматчимиз Юлия Хегай ҳар уч йўналишда муваффақиятли иштирок этиб, иккита кумуш ва битта бронза медални қўлга киритган бўлса, 9 ёшгача қизлар ўртасида Зилола Актамова блиц йўналишда 8,5 очко билан биринчи, рапид йўналишда 5 очко билан учинчи ўринни эгаллади.

Ўн уч ёшгача ўғил болалар ўртасида Мирфайз Суннатов блиц йўналишида 6,5 очко жамғариб, чемпионатнинг бронза медали билан тақдирланди.

Байрам Айтмуродов, ЎзА