Sirdaryoda Olimpiadaga yo'llanma olgan sportchi hokimlik tomonidan ham alohida 100 million so'm bilan taqdirlandi

Gulistonda “Yangi O'zbekiston yoshlari, birlashaylik!” shiori ostida o'tkazilgan “Bag'rikeng O'zbekiston – umumiy uyimiz” millatlararo do'stlik festivali doirasida o'tkazilgan tadbirlarga yuz mingdan ziyod yoshlar qatnashdi.

Festivalda turli sohalarda yuksak natijalarga erishgan va tanlovlarda g'olib bo'lgan yoshlar hamda jamoalarning yutuqlari yigit-qizlarga ibrat qilib ko'rsatilgan holda ular munosib ravishda rag'batlantirildi. Xususan, Tokio-2020 Olimpiada o'yinlari yo'llanmasini qo'lga kiritgan sirdaryolik sportchilarni taqdirlash marosimi minglab yoshlar ishtirokida o'tkazildi.

Sirdaryo viloyati hokimi G'ofurjon Mirzaev tadbirda dunyoning eng nufuzli sport anjumanida qatnashish huquqini qo'lga kiritgan sportchilar Server Ibragimov (o'q otish), SHahboz Xolmirzaev (akademik eshkak eshish) hamda Safina Sadullaeva (engil atletika)larni ulkan muvaffaqiyat bilan samimiy tabriklab, ularning har biriga viloyat hokimligi tomonidan 100 million so'mdan pul mukofoti hamda qimmatbaho sovg'alar topshirildi. SHuningdek, hokim taqdirlash marosimida Olimpiada o'yinlarida g'olib va sovrindor bo'lib qaytgan sportchilar xonadon hamda qimmatbaho sovg'alar bilan taqdirlanishi haqida ham elon qildi.

Malumot uchun: Tokio-2020 Olimpiadasida Sirdaryo viloyati tarixida birinchi marotaba uch nafar sirdaryolik sportchi qatnashadigan bo'ldi.