450 gramm tug'ilgan, buyuk depressiyadan qutilib, AQSHni zabt etayotgan super og'ir vaznli bokschi - Tayson Fyuri haqida

Yulduzning tug'ilishi

Tayson Fyuri tug'ilishidan bir yarim oy oldin afsonaviy Mayk Tayson Maykl Spinksni birinchi raunddayoq nokaut qilgan. SHu boisdan, Fyurining otasi shu g'alaba sharafiga o'g'liga Tayson ismni berishga qaror qilgan. Bu nom yosh go'dakka kuch beradi deb hisoblagan, sababi Tayson bor-yo'g'i olti oyligida dunyoga kelgan, uning tug'ilganda vaznni esa atigi 1 funt(450 gramm)ni tashkil qilgan. SHifokorlar chaqaloqni yashab ketishga umuman ishonishmagan. Lekin shu go'dak 27 yildan so'ng 112 kg, 206 sm.ga ega bo'ldi.

Aynan shu chaqaloq Dyusseldorfda Vladimir Klichko ustidan zafar quchdi. Lekin bu g'alabadan bir yarim yil o'tib, Fyurining hayoti izdan chiqdi. Giyohvand moddalar, alkogol mahsulotlarga mukkasidan ketdi, vazni 180 kgdan oshdi, joniga qasd qilishga urindi. Bokschi shu kunlarni eslab: «Men o'sha paytda "Ferrari" avtomobilini sotib oldim, shundan so'ng 306 km/soat tezligida haydab to'g'ri devorga qarab urish niyatida edim, lekin qaerdandir "Tayson - sening oilang, bolalaring bor, ularni o'yla, degan ovozlar eshitildi, men shu zahoti tormozni bosdim",-degan edi. SHundan so'ng Tayson 2017 yilning noyabr oyiga kelib, o'ziga kela boshladi. Mashg'ulotlarni qaytadan boshladi.

"Men oddiygina lo'liman"

Tayson Fyuri haqida ishlangan hujjatli filmda, bokschining otasi ular ko'p yil davomida yashagan gildirakli uyni ko'rsatadi. Tayson yoshligidan juda ko'p qiyinchilikka uchragan."Menga ko'pincha nochordek qarashardi, ko'p odamlar meni ajratardi. Men ko'pchilik uchun oddiygina lo'li bo'lib ko'rinaveraman",-degan edi yoshligini eslab engilmas boks yulduzi. Yillar o'tdi, aynan shu lo'li bolakay boks afsonasi deyarli o'n ikki yildan beri mag'lubiyatga uchramagan Vladimir Klichkoni taslim etdi. Aynan shu nochor bola 2018 yilning 1 dekabrida mag'lubiyat nimaligini bilmay kelgan Deontey Uaylderga qarshi jang o'tkazib, durrangga erishgan.

Tayson Fyurining boksga kirib kelishi

Fyuri o'n yoshida maktabni tashlab, boks bilan jiddiy shug'ullanishga qaror qiladi. U ota tomondan ham ona tomondan ham lo'lilarga yaqin bo'lgan, shu boisdan u yoshligidan qo'lqopsiz janglarda muntazam ishtirok etgan. U o'n to'rtga kirganda otasi bilan sparing janglarini o'tkazardi, otasini shunday qattiq urar edi, bu og'riqlardan otasi quvonar edi. Taysonga otasi va bobosi navbatma-navbat murabbiylik qilishgan. Uning otasi hamda bobosi ko'p yillar davomida qamoqxonada bo'lishgan. Fyurining Klichkoga qarshi jangiga oz muddat qolganda otasi o'n bir yilga qamaladi, shu paytlarda bobosi bosh murabbiylikni o'z qo'liga olardi. Hozirda Tayson 27 yoshli murabbiy Ben Devison bilan ishlaydi. SHuningdek, uning burchagida Rikki Xatton hamda Freddi Rouch o'z maslahatlarini berib turmoqdalar. Tayson qo'pol gavda tuzilishga ega bo'lsada, uning raqiblari Fyuri tomon zarba berishga doim qiynalishadi. Qahramonimiz hech qachon pancherlikka davogarlik qilmagan. Uning ustunligi - zarbalardan qochib, aniq ochkolik zarbalar berish. U nafaqat ringda, balki ring tashqarisida ham xavfli. U shoumen, u ustalik bilan raqibiga bosim o'tkazadi. U shunchaki fenomen.

Endi nima bo'ladi?

2019 yilning 1 yanvarida super og'ir vaznda uchta qirol bor edi. Bular - Deontey Uaylder, Entoni Joshua hamda Tayson Fyuri. Har uch bokschi ham yozda o'z janglarini o'tkazdilar, Deonteyga g'alaba qozonishi uchun bir raund etgan bo'lsa, Fyuriga ikki raund kifoya qildi. Lekin, Joshua o'ziga berilgan vazifani bajara olmadi hamda faoliyatidagi dastlabki nokautni qabul qildi. Tayson Fyuri va Tom SHvarc jangi 15 iyul sanasida bo'ldi. «Lo'lilar Qiroli» birinchi marta AQSHda jang qildi. U bu bahsga o'zgacha uslubda keldi. U AQSH bayrog'i tushirilgan kiyimlarda ringga kirib keldi. Muxlislar ham, Taysoning o'zi ham AQSHdagi birinchi safaridan xursand bo'ldi. Fyuriga engilmas raqibini mag'lub etishga bor-yo'g'i olti daqiqa etarli bo'ldi. G'alabadan so'ng xotiniga atab "Aerosmith" qo'shig'ini kuyladi. Endi Tayson Fyurining bosh maqsadi bor. U hozirgi zamon AQSH boks qiroli Deontey Uaylderni aynan o'z zaminida mag'lub etishdir.

Nig'monxo'ja Nozimov tayyorladi