10 fev 15:26
Yangiliklar
Ahmadaliev boshlab berdi. Keyingisi kim? Yaqin orada jahon chempioni bo'lishi mumkin bo'lgan o'zbek bokschilari (TOP-5)
Jahon chempionligi nomiga hamyurtimiz Murodjon Ahmadaliev o'zining 8-jangidayoq sazovor bo'ldi. Bu hali boshlanishi albatta. Hozirgi kunda bir qancha boshqa professional bokschilarimiz ham yuqori reytinglarda qayd etilgan. Keling, ularning chempionlikka qay darajada yaqin ekanligini tahlil qilib ko'ramiz. Demak bizda chempionlikka yaqin turgan bokschilar TOP-5ligi.
1. Qudratillo Abduqahhorov (17-0, 9 KO)
Qudratillo Abduqahhorov hozirgi kunda yarim o'rta vaznda ( -66,6 kg) IBF reytingida birinchi, WBC reytingida beshinchi va WBO reytingida to'qqizinchi o'rinda bo'lib, hozirda Errol Spens (26-0, 21 KO)ga tegishli bo'lgan IBF chempionlik kamari uchun majburiy davogar sifatida qayd etilgan. Ammo, Spens avtofalokatga uchragani va jarohat olgani bois IBF vaqtinchalik chempionlik kamari uchun Qudratillo Abduqahhorov va reytingda 3-pog'onada borayotgan Rossiyalik Sergey Lipinec (16-1, 12 KO) o'rtasidagi jangga buyruq berdi. Mazkur jang g'olibi keyinchalik chempionga qarshi ringga chiqish huquqini qo'lga kiritadigan bo'ldi. Abduqahhorov va Lipinec jangi mart oyi oxirlari yoki aprel oyi boshiga reja qilinmoqda.
2. Isroil Madrimov (4-0, 4 KO)
Isroil Madrimov hozirda birinchi o'rta vaznda (69,8 kg) WBA reytingida 3-o'rinda qayd etilgan. U professional faoliyati davomida barcha janglarida raqiblarini muddatidan oldin mag'lubiyatga uchratgan. Madrimov o'zining navbatdagi jangini WBA reytingida 10-pog'onada borayotgan CHarli Navarroga (29-9, 22 KO) qarshi o'tkazadi. Bu jang 10 raundlik etib belgilangan va WBA Eleminator (chempionlik jangi uchun davogarlik) jangi hisoblanadi. Ammo bu vaznda 2 ta chempionlik kamari bor. Asosiy kamar Xeison Rosarioga (20-1-1, 14 KO) tegishli bo'lsa WBA Regular (muntazam) chempionlik kamari kubalik Erislandi Laraga tegishli. Madrimov aynan Laraga tegishli kamarga davogarlik uchun ringga chiqadi.
3. Azizbek Abdug'ofurov (13-0, 5 KO)
Azizbek Abdug'ofurov supero'rta (76,2 kg) vaznda WBC Silver kamari sohibi va ushbu yo'nalish reytingida 2-pog'onada bormoqda. Bu yo'nalish chempioni amerikalik David Benavides ( 22-0, 19 KO) va majburiy davogar WBC reytingida 1-o'rindagi Anvi Yildirim (21-2, 12 KO) hisoblanadi. Bu ikkala bokschi o'zaro jang o'tkazgach, tabiiyki reytingda 2-pog'onadagi hamyurtimiz majburiy davogarga aylanadi va chempionlik jangida ishtirok etish huquqiga ega bo'ladi. Azizbek o'zining navbatdagi jangini 11 aprelda Angliyaning London shahrida Lerrone Richardsga (13-0, 3 KO) qarshi o'tkazishi va WBC Silver kamarini himoya qilishi reja qilinmoqda. U Angliyaning "Quensberry" promouterlik kompaniyasi bilan 5 ta jangga shartnoma qilgan va 1-jangini o'tkazib ulgurgan. Qolgan 4 ta janglardan birida u chempionlik uchun ringga chiqishi kutilmoqda.
4. SHohjahon Ergashev (18-0, 16 KO) va SHahram G'iyosov (9-0, 7 KO)
Biz bu ikki bokschining imkoniyatlarini hozirgi holatdagi reytingdan kelib chiqib teng baholamoqdamiz. SHohjahon Ergashev superengil (63,5 kg) vaznda WBA va IBF reytingida 6, WBO reytingida 13-pog'onada qayd etilgan bo'lsa, SHahram G'iyosov WBA reytingida 7, IBF reytingida 15-pog'onadan o'rin olgan. Ammo, ushbu vaznda WBA va IBF yo'nalishi chempioni Josh Taylor ( 16-0, 12 KO) keyingi jangini IBF yo'nalishida majburiy davogar Apinun Kongsongga qarshi o'tkazishi, uni WBA yo'nalishida ham majburiy davogar Lyuis Ritson kutib turganini, keyinchalik esa WBC va WBO chempioni Xose Ramiresga qarshi mutlaq chempionlik uchun ringga chiqishni reja qilayotganini hisobga olsak, bu yil ikkala bokschimizdan ham asosiy kamarga chiqish imkoni yo'q ekanligi malum bo'ladi. Ammo, ularda hozirda Marrio Barriosga tegishli WBA Regular (muntazam) va Alberto Puelloga tegishli WBA Interim (vaqtinchalik) chempionlik kamarlaridan biri uchun 2020 yilning o'zidayoq ringga chiqish imkoniyati bor. Bunga bokschilarning reytingi va imkoniyatlari ham birdek etarli.
5. Bektemir Meliqo'ziev (4-0 3 KO)
Bektemir Meliqo'ziev prof ringda 4 ta jang o'tkazgan bo'lsada, boks ommasiga tanilib ulgurdi. U 3-jangida Von Aleksandrni ochkolar hisobida hakamlarning bir ovozdan qarori bilan (100-90 hisobida) mag'lub etdi va super o'rta vaznda (76,2 kg) WBA Americas kamarini qo'lga kiritib, reytingda 15-o'ringa ko'tarilib oldi. Meliqo'zievning asosiy shartnomasi "Mir Boksa" kompaniyasi bilan. SHu bilan birga u mashhur Oskar De La Xoyyaga qarashli "Golden Boy" promouterlik kompaniyasi bilan sopromoushen(qo'shimcha hamkorlik) shartnoma imzoladi. Bu orqali uning janglari "Golden Boy" tashkil qilgan jang kechalarida o'tkazadigan bo'ldi. Uning promouterlari rejaga ko'ra 10 ta janggacha chempionlik kamari uchun jang qilinishi ko'zda tutilgan.
Biz barcha bokschilarimizga omad tilaymiz. G'alabalar davomli bo'lsin...
Jalol Ahmedov tayyorladi
Fikrlar