Alisher Usmonov Xalqaro qilichbozlik federaciyasi prezidentligiga qayta saylandi

Kongress kun tartibidagi asosiy masala tashkilotga yangi Olimpiada cikli uchun rahbar saylash edi. Unda amaldagi prezident Alisher Usmonov g'alaba qozonib, tashkilotdagi boshqaruvini davom ettiradigan bo'ldi.

Mazkur tadbirga rasmiy mehmon sifatida tashrif buyurgan Xalqaro Olimpiya qo'mitasi prezidenti Tomas Bax Alisher Usmonovni saylovdagi g'alabasi bilan tabrikladi. Eslatib o'tamiz, A.Usmonov 2008 yildan beri Xalqaro qilichbozlik federaciyasini boshqarib kelmoqda.

Quvonarlisi, saylov yakunlariga ko'ra hamyurtlarimiz ham tashkilotning bir qator bo'limlari tarkibiy qismiga kirishdi. Jumladan, O'zbekiston qilichbozlik federaciyasi Bosh kotibi Gulnora Saidova targ'ibot qo'mitasi, Tokio-2020 Olimpiadasida referilik qilgan Aida Hasanova hakamlar qo'mitasi tarkibiga kiritildi.

Tadbir davomida 2023 yilgi jahon chempionati mezbonligiga davogar Toshkent shahrining taqdimoti namoyish etildi. Taqdimotni O'zbekiston MOQ va O'zbekiston qilichbozlik federaciyasi raisi Rustam SHoabdurahmonov hamda Gulnora Saidova o'tkazishdi. Garchi u ko'pchilikda katta qiziqish uyg'otgan bo'lsa ham, yakunda mezbonlik Milanga nasib etdi.