Andijon viloyati dzyudosi istiqbollari muhokama qilindi

O'zbekiston Milliy olimpiya qo'mitasi raisi o'rinbosari, mamlakat dzyudo federaciyasi raisi Azizjon Kamilov Andijon viloyati dzyudosiga rahbar etib saylangan Sardorbek Rahmonov bilan ZOOM platformasida tashkil etilgan onlayn muloqotda istiqbolli rejalar yuzasidan fikr almashdi. Sardorbek Rahmonov Andijon viloyati hokimligining moliya bosh boshqarmasi boshlig'i lavozimida ham faoliyat yuritadi.  

"Andijon viloyati dzyudosida tez orada o'zgarishlar bo'lishiga ishonamiz. Biz birgalikda viloyat dzyudosini yangi bosqichga olib chiqish uchun harakat qilamiz. Hali Andijondan ham terma jamoaga nomzod dzyudochilar etishib chiqadi. Bir narsani unutmaylik, terma jamoaning kuchli bo'lishi aynan hududlarga bog'liq. Istedodlar hamisha bo'lgan, faqat ularga o'z vaqtida etibor berib, kerakli sharoitlarni qilib berishimiz kerak", - dedi A.Kamilov. 

O'z o'rnida Sardorbek Rahmonov Andijon viloyati dzyudosini yangi bosqichga ko'tarish uchun say-harakatlar boshlab yuborilgani, birinchi navbatda moddiy-texnik bazani yaxshilash, dzyudochilar yaxshi sharoitlarni yaratish, viloyatda selekciya jarayonini kuchaytirish, ichki musobaqalarni ko'proq o'tkazish masalalariga etibor qaratilishini takidladi.