"Dakar" rallisi 20 yildan so'ng Afrikaga qaytadi

Tashkilotchilar bunga Yaqin SHarqdagi so'nggi voqealarni sabab qilib ko'rsatdi.

Amaury Sport Organisation (A.S.O.) malumotiga ko'ra, 49-"Dakar" rallisi 2027 yil 9–23 yanvar kunlari o'tkazilishi rejalashtirilgan. Musobaqaning umumiy masofasi 7 824 km bo'lib, shundan 4 341 km tezlik maxsus uchastkalariga to'g'ri keladi.

Ralli 12 bosqichdan iborat bo'ladi. Musobaqa sanalari hali Xalqaro avtomobil federaciyasi (FIA) tomonidan tasdiqlanishi kerak.

Start Portugaliyaning Algarve hududidagi Lole–Faru atrofida beriladi. 9 yanvar kuni prolog, yani, kirish bosqichi, 10 yanvar kuni esa birinchi maxsus bosqich o'tkaziladi. SHundan so'ng ishtirokchilar O'rta Er dengizi orqali Marokashga o'tadi.

Rallining asosiy qismi Marokash hududida bo'lib o'tadi. Yo'nalish Buarrfa, Zagora, Agadir, Smara va Daxla atroflaridan o'tadi. 17 yanvar Agadirda dam olish kuni sifatida belgilangan, 23 yanvar kuni esa musobaqa Marrakeshda yakunlanadi.

"Dakar" 2020–2026 yillar davomida 7 yil ketma-ket Saudiya Arabistonida o'tkazildi. 2028 yilda esa musobaqani yana qirollikka qaytarish va u erda yubiley — 50-"Dakar"ni o'tkazish rejalashtirilgan.