Andijonlik yosh gandbolchilar kubok sohibi bo'ldi

Avval xabar qilinganidek, Andijon shahridagi universal sport majmuasida 17-30 yoshli mahalla yoshlari o'rtasida o'tkazilgan gandbol musobaqasining respublika final bosqichida Qoraqalpog'iston Respublikasi va viloyatlarda birinchi o'rinni qo'lga kiritgan mahalla jamoalari ishtirok etib, g'oliblik uchun o'zaro bahs olib bordi. 

Musobaqaning har bir uchrashuvi qiziqarli va murosasiz bahslar ostida o'tdi. Finalda barcha raqiblaridan ustun kelgan Andijon viloyati Qo'rg'ontepa tumanining Obod turmush hamda Jizzax viloyatidagi Sovungarlik mahallasi jamoalari o'zaro kuch sinashdi. Uchrashuvda andijonlik gandbolchilar 32:28 hisobida jizzaxlik tengdoshlarini mag'lubiyatga uchratib, “O'zbekiston mahallalar uyushmasi kubogi”ni qo'lga kiritdi. 

– Jamoamiz uchun o'yinlar oson kechmadi, – deydi Obod turmush mahallasi jamoasi azosi SHohjahon Abdullaev. – Avvalgi o'yinlarda Samarqand va Namangan viloyati jamoalarini mag'lubiyatga uchratgan edik. Finalda jizzaxlik tengdoshlarimizdan ustun kelib, bosh sovrin sohibi bo'ldik. Ushbu g'alabamiz tufayli mahallamizda universal sport maydonchasi barpo etiladigan bo'ldi. Bundan behad xursandmiz. 

Uchinchi o'rin uchun o'tkazilgan uchrashuv ham juda qiziqarli o'tdi. Unda Toshkent shahrining Dilbuloq mahallasi jamoasi Surxondaryo viloyati Jayxun mahallasi jamoasini 22:21 hisobida mag'lubiyatga uchratib, 3-o'ringa sazovor bo'ldi. 

Uchrashuvlardan so'ng g'olib va sovrindorlar tantanali ravishda taqdirlandi. Ularga kubok, tegishli medal va esdalik sovg'alarni O'zbekiston Mahallalar uyushmasi raisi Qahramon Quronboev, O'zbekiston Yoshlar ishlari agentligi rahbari Alisher Sadullaev, Andijon viloyati hokimi o'rinbosari Komiljon Komilov topshirdi.