AQSH medallar jamg'arish bo'yicha birinchi bo'ldi. O'zbekiston nechanchi o'rinda?

Erkaklar o'rtasidagi suv polosi musobaqasining hal qiluvchi final bahsida Serbiya va Greciya terma jamoalari Olimpiada oltin medali uchun suvga tushishgan. Bu uchrashuvdagi medal umumjamoa hisobidagi TOP-10 likka hech qanday tasir o'tkazmaydi. 

Demak, AQSH terma jamoasi medallar jamg'arish bo'yicha Tokio-2020 Olimpiadasini birinchi o'rinda yakunladi. Amerikaliklar asosiy taqibchilari hisoblangan Xitoy terma jamoasidan bitta ko'p oltin medal jamg'arishdi. Okean orti jamoasi besh yil kutilgan olimpiya o'yinlarida 39 ta oltin, 41 ta kumush, 33 ta bronza, jami 113 ta medal qo'lga kiritishdi.

Xitoy terma jamoasi esa 38 ta oltin, 32 ta kumush, 18 ta bronza, jami 88 ta medalga egalik qildi. Kuchli uchlikka 27 ta oltin, 14 ta kumush, 17 ta bronza, jami 58 ta medal bilan Yaponiya terma jamoasi yakun yasadi. TOP-10 talikdan Buyuk Britaniya, Rossiya, Avstraliya, Niderlandiya, Franciya, Germaniya va Italiya terma jamoalari joy oldi. 

O'zbekiston terma jamoasi ayni paytda 3 ta oltin va 2 ta bronza medali bilan dunyoning 205 davlati orasida 31-o'rinni band etgan. Agar Serbiya suv polosi terma jamoasi ayni daqiqalarda davom etayotgan finalda g'alaba qozonsa, bizdan jadvalda o'tib ketadi.