Ar-Riyoddagi UFC turniri kardiga yana bir jang qo'shildi

Mag'lubiyat nimaligini bilmay kelayotgan rossiyalik aralash yakkakurash ustasi Magomed Gadjiyasulov ham ushbu turnirda jang qiladigan bo'ldi. Yarimog'ir vazn toifasidagi Magomed UFC Fight Night oqshomida braziliyalik Brendson Ribeyroga qarshi oktagonga chiqadi. 

Gadjiyasulov 8 ta g'alabali seriya bilan kelmoqda. Magomed faoliyati davomida Brave FC va Eagle FC promoushenlarida o'z janglarini o'tkazgan. U Dana White Contender Series 2023 turnirida Xose Medinani mag'lubiyatga uchratganidan keyin UFC promousheni bilan shartnoma imzolagandi. 

Brendson Ribeyro esa 13 g'alaba va 6 mag'lubiyat qayd etgan. U ham UFC ligasiga Dana White Contender Series turniridagi g'alabasidan so'ng taklif etilgan. O'shanda u Bruno Lopesni birinchi raundning ikkinchi daqiqasidayoq nokautga uchratgan edi. Lekin uning kuchli ligadagi debyuti omadsiz chiqqandi. Ribeyro UFC 298 turniri doirasidagi jangning birinchi raundida Jang Mingiang tomonidan nokautga uchratilgandi.