Aral marathon. Urganchda xalqaro ekologik marafon o'tkazildi FOTOGALEREYA

Mazkur konferenciya oldidan O'zbekiston Ekologik partiyasi tashabbusi bilan O'zbekiston Milliy olimpiya qo'mitasi, Jismoniy tarbiya va sport, Ichki ishlar, Mudofaa va Madaniyat vazirliklari, Turizmni rivojlantirish davlat qo'mitasi, O'zbekiston milliy teleradiokompaniyasi, O'zbekiston engil atletika federaciyasi, O'zbekiston aeronavtika federaciyasi hamkorligida 17-22 oktyabr kunlari O'zbekistonda birinchi marta “Biz kelajak uchun javobgarmiz” shiori ostida mamlakatimizning olti shahrida 5 kilometr masofaga yugurish bo'yicha “Aral marathon” xalqaro ekologik marafoni uyushtirilmoqda. 

Bugun ana shu marafonning Urganch bosqichi o'tkazildi. Unda talim muassasalarining o'quvchi va talabalari, davlat va jamoat tashkilotlari vakillari, sportsevar yoshlar va faxriylar, shuningdek, poytaxtimizdan tashrif buyurgan marafonchilar ishtirok etishdi. O'z navbatida tadbir qatnashchilari Urganch xalqaro aeroporti yaqinidan buyuk sarkarda Jaloliddin Manguberdi xiyobonigacha bo'lgan masofani bosib o'tishdi.

- Bugun o'ziga xos marafonning guvohiga aylandik, - deydi Xorazm viloyati jismoniy tarbiya va sport boshqarmasi boshlig'i SHokir Madaminov. - Marafon qatnashchilari o'zlari bilan suv solingan maxsus idishni ham marraga etkazishdi. Tabiiyki, bu barchaning etiborini tortdi. Binobarin, marafonning tashkil etishdan maqsad, aholimiz o'rtasida hayotimiz manbai bo'lgan suv resurslarini tejab ishlatishni va undan samarali foydalanishni targ'ib qilish, shuningdek, tabiatimizni asrab-avaylash va unga mehr bilan qarash hamda joylarda sog'lom turmush tarzini shakllantirishga qaratilgan. Albatta, ushbu xayrli jarayonga ulush qo'shayotganimizdan benihoya xursandmiz.

Binobarin, marafonning Urganch bosqichi bo'yicha erkaklar o'rtasida birinchi o'rinni “Vatanparvar” tashkiloti Xorazm viloyati texnik va amaliy sport turlari markazi sportchisi Odamboy Rahimov egalladi. Ushbu yo'nalishda ikkinchi o'rinni Sport o'yinlari va engil atletikaga ixtisoslashtirilgan BO'SM shug'ullanuvchisi Mirjalol Kenjaev, uchinchi o'rinni Urganch davlat universiteti talabasi Abdulaziz Tillaev band etdi. Ayollar orasida esa Urganch ixtisoslashtirilgan olimpiya zaxiralari maktab-internati tarbiyalanuvchisi Munisaxon Hayitboeva zafar quchdi. Ushbu maktab-internati o'quvchisi Mohichehra Bozorboeva ikkinchi, Urganch davlat universiteti talabasi Ro'zikajon Yo'ldosheva uchinchi o'rindan joy oldi.

Tadbirning taqdirlash marosimi Jaloliddin Manguberdi xiyobonida bo'lib o'tdi. Unda “Biz kelajak uchun javobgarmiz” shiori ostida o'tkazilgan “Aral marathon” xalqaro ekologik marafonining g'olib va sovrindorlariga tashkilotchilarning qimmatbaho sovg'alari topshirildi.

Ikrom XUDOYBERGANOV, Urganch shahridan