Avlodlar almashinuvi o'z yo'liga. Bizga Olimpiada medali kerak

Deyarli 80 foiz kutilgan tarkib va bu boks muxlislari orasida, ijtimoiy tarmoqda iliqlik bilan kutib olindi. Albatta bazi vazn toifalarida savollar yo'q emas. Kimdir yosh To'rabek Xabibullaevning nima asosida terma jamoaga jalb qilingani haqida gapirsa, yana kimdir Bahodir Jalolov yoshlarga joy berishi kerakligi haqida yozib, o'z noroziligini bildirdi. 

Albatta Bahodir Jalolov havaskor boksda barchasini isbotlab bo'lgan. Olimpiada chempioni, ikki karra jahon chempioni, bir necha marotaba Osiyo chempioni... Lekin, mazkur Osiyo o'yinlari Parij Olimpiadasiga licenziya taqdim etishini yoddan chiqarmasligimiz kerak. Olimpiadada esa har bir medalning qadri yuqori. Bir necha yildan beri eng og'ir vazn toifasida chempionlikni xech kimga bermay kelayotgan Bahodir Jalolovning ishtiroki esa bizga oltin medal kutishimizga asos bo'ladi. Demak "avlodlar almashinuvi", "yoshlarga yo'l berish" kabi fikrlarni Parij Olimpiadasigacha bir chetga surib turamiz. Bahodir Jalolovning o'zi ham Olimpiya o'yinlaridan keyin asosiy etiborini professional boksga qaratishini bir necha marotaba takidlab o'tdi. Vaziyatning aynan shunday scenariyda tus olishi Bahodirning o'zi uchun ham, O'zbekistonning Olimpiya o'yinlaridagi reytingi uchun ham yaxshi, nazarimizda.

-80 kg vazn toifasida terma jamoamizga jalb etilgan To'rabek Xabibullaevni o'zbek boksini yaqindan kuzatib kelayotgan muxlislarimiz yaxshi bilishadi. U o'tgan yili Ispaniyada yoshlar o'rtasida o'tkazilgan jahon chempionatida oltin medalni qo'lga kiritgach, kattalar o'rtasidagi bir qator musobaqalarda ishtirok etdi. Vengriyada o'tkazilgan turnirda u finalga qadar etib borib, hal qiluvchi jangda Olimpiada finalchisi, ukrainalik Oleksandr Xijnyakka munosib qarshilik ko'rsatgandi. Qozog'istondagi "Elorda kubogi"dan ham u bronza bilan yurtimizga qaytgan. U shuningdek mashg'ulotlarda, sparring janglarda ham o'zini ko'rsatgan va asosiy tarkibga loyiq ekanligini isbotlagan.

Qolgan vazn toifalarida esa etirozlar deyarli yo'q. Hasanboy Do'smatov, Abdumalik Xalokov, Ruslan Abdullaev, Asadxo'ja Mo'ydinxo'jaevlar Xanchjouga jahon chempioni sifatida yo'l olishmoqda. Toshkentdagi JCHda bronza medaliga ega chiqqan Lazizbek Mullojonov ham o'zi uchun yangi bo'lgan -92 kg vaznga moslashib ulgurdi. Eng muhimi La Kruzdek afsonani mag'lub etgan Lazizbekda o'ziga bo'lgan ishonch yuqori. 

Osiyo miqyosidagi so'nggi musobaqalarda O'zbekiston etakchi ekanligini inobatga olsak, vakillarimizning asosiy qismi Osiyo o'yinlarining o'zidayoq licenziyalarni qo'lga kiritib olishlari mumkin. Lekin shuni unutmaslikk kerakki, bunday musobaqalarda quraga ham ko'p narsa bog'liq bo'ladi. Faqatgina finalga yo'l olgan bokschilar Parij Olimpiadasi licenziyasiga ega chiqishadi. Bu esa biroz qo'shimcha bosim yuklashi mumkin. Ammo har qanday holatda ham yigitlarimizdan maksimal natija kutamiz.

Malumot uchun, Osiyolik bokschilar uchta musobaqa orqali Olimpiadaga licenziya qo'lga kiritishlari mumkin:

24 sentyabr - 5 oktyabr - Xanchjou, Xitoy (Osiyo o'yinlari)

29 fevral - 12 mart - Busto Arsizio, Italiya (Jahon licenzion turniri)

23 may - 5 iyun - Bangkok, Tailand (Jahon licenzion turniri)