Bahraynlik aralash yakkakurash ustasi UFC turnirning asosiy jangida oktagonga ko'tariladi

Etiborlisi, UFC Fight Night 238 oqshomining asosiy jangida asli kelib chiqishi dog'istonlik bo'lgan, hozirda Bahrayn davlati sharafini himoya qilayotgan SHamil Gaziev  xedlayner maqomida oktagonga chiqadi. Og'ir vazn toifasida janglarini o'tkazib kelayotgan Gaziev surinamlik nokautchi Jairzino Rozenstrayk bilan o'zaro to'qnash keladi.

SHamil o'zining UFC oktagonidagi ikkinchi jangidayoq shunday imkoniyatga ega bo'lmoqda. Aslida UFC Fight Night 238 turniri Saudiya Arabistoni poytaxti Ar-Riyod shahrida o'tkazilishi kerak edi. Ammo promoushen rahbarlari Saudiyadagi turnirni yoz fasliga ko'chirishga qaror qilishdi. 

Malumot uchun, mag'lubiyat nimaligini bilmay kelayotgan 33 yoshli SHamil Gaziev o'tgan yilning dekabr oyida UFC promoushenidagi debyut jangini o'tkazgandi. Las-Vegasda o'tgan UFC 296 turnirida u Martin Budayani ikkinchi raundda texnik nokautga uchratgan edi.

Surinamlik 35 yoshli Jairzino Rozenstrayk esa so'nggi janglarida omadsizlikka uchramoqda. U oxirgi 8 ta jangidan 5 tasida mag'lubiyat alamini totib ko'rdi. "Bigi Boy" o'tgan yilning may oyida Jailton Almeydaga yutqazib qo'ygandi. Jailton raqibini birinchi raunddayoq bo'g'ib qo'ygan edi. 

Ayni paytda Jairzino Rozenstrayk UFC og'ir vaznlilar reytingida 12-o'rinni egalab turibdi. SHamil Gaziev esa hali divizionning Top-15 jangchilari safiga kirmagan.