Bahromjon Gaziev O'zbekiston polo federaciyasiga rais etib saylandi

Bugun yurtimizga yangi sport turi kirib keldi, deb aytish mumkin. Toshkent Xalqaro Vestminster universitetida kuni kecha ochilgan O'zbekiston polo federaciyasiga yangi rahbar saylash marosimi bo'lib o'tdi. Tadbirni MOQ Bosh kotibi Oybek Kasimov olib bordi. Oybek Omilovich dastavval tadbirning kun tartibi bilan tanishtirib o'tdi. SHundan so'ng kun tartibidagi birinchi masala – O'zbekiston polo federaciyasiga yangi rahbar saylash jarayoniga o'tildi. Bu borada O'zbekiston zamonaviy beshkurash federaciyasining raisi Bahromjon Gaziev nomzodi ilgari surildi. Ishtirokchilar nomzodni bir ovozdan maqullashdi va B.Gaziev O'zbekiston polo federaciyasiga rais etib saylandi.

Tadbir davomida Bahromjon Valievich yangi lavozimga saylangani haqida o'z fikrlarini bildirib o'tdi.

«Ushbu lavozimga loyiq ko'rganingiz uchun barchangizdan minnatdorman. Bu men uchun sharaf. Elkamda katta masuliyat turganini his qilib turibman. Muhtaram Prezidentimiz boshchiligida mamlakatimizda sportni rivojlantirish borasida ulkan ishlar olib borilmoqda. Temuriylar davrida xalqimiz sevib o'ynagan ushbu sport turini qaytarish vaqti keldi. Bu borada Jismoniy tarbiya va sport vazirligi, Milliy Olimpiya qo'mitasi, Xalqaro polo federaciyasi va boshqa tashkilotlar bilan yaqindan hamkorlikni yo'lga qo'yamiz», – dedi Bahromjon Gaziev.

SHundan so'ng federaciya rahbariyatining boshqa lavozimlariga vakillar saylandi. Unga ko'ra, O'zbekiston polo federaciyasining rahbariyati quyidagicha ko'rinish oldi:

Federaciya raisi: Bahromjon Gaziev
Faxriy rais: Komiljon Karimov
Rais maslahatchisi: Yakov Ribalskiy
Rais o'rinbosarlari: Bahrom Mirmaksimov, Kseniya Gulyamova, Axror Haydarov.
Bosh kotib: Abdurasul Mo'minov

Tadbir davomida MOQ vice-prizedenti, O'zbekiston boks federaciyasi raisining birinchi o'rinbosari Saken Polatov ham so'zga chiqib, yangi jamoaning kelajakdagi faoliyatiga omad tilab o'tdi.

SHuning bilan O'zbekiston polo federaciyasining navbatdan tashqari hisobot-saylov konferenciyasi o'z ishini yakunladi.