Baklini mag'lub etgan Usman keyingi raqibi kim bo'lishini aytdi

Yarimo'rta vazn toifasidagi eng tajribali aralash yakkakurash ustasi kecha AQSHning Atlanta shahrida o'tgan UFC on ESPN 69 turnirining asosiy jangida amerikalik Xoakin Baklini 5 raund natijalariga ko'ra hakamlarning yakdil qarori (48-47, 49-46, 49-46) bilan mag'lubiyatga uchratgan edi. 

"Qisqa muddatda o'zimdan ancha yosh, ayni kuchga to'lgan, g'alabaga chanqoq, diviziondagi eng xavfli raqibni berishdi. Odamlar meni esdan chiqarib qo'yishgandi. Jin ursin, ular meni jang qilishni bilmaydiganga chiqarishgandi. Ularning munosabati menga haqorat edi. Men bugun ko'rsatgan jangim bilan ularga munosib javob berdim", - dedi UFC on ESPN 69 turniridan keyingi matbuot anjumanida.

SHuningdek, Usman keyingi jangida yarimo'rta vazn chempionligi uchun kechadigan Jek Della Maddalena va Islam Maxachev o'rtasidagi to'qnashuv g'olibiga qarshi oktagonga chiqmoqchi ekanini yashirib o'tirmadi.

"Kelinglar, ochiq gaplashamiz. Men ayni paytda diviziondagi eng katta nom va tabiiyki, yulduzman. UFC promoushenida hamma narsa shou ustiga quriladi. Eng katta jang ham Jek Della Maddalena va Islam Maxachev o'rtasidagi jang g'olibiga qarshi bo'ladi. Agar Islam g'alaba qozonsa, unda tashkilotning kechagi va bugungi eng yaxshi jangchisi uchrashadi – kim bu to'qnashuvga katta pul to'lamaydi? Bu jangni hamma ko'rishni xohlaydi. SHu qatorida men ham. Bugungi ko'rsatgan jangim menga kamar uchun oktagonga chiqish huquqina beradi, deb o'ylayman", - deya so'zlariga yakun yasadi nigeriyalik sobiq chempion.