Bangkokda nima gap? Bokschilarimizning mashg'ulotlari, Tailanddagi o'zbek muxlislari va qura

Musobaqa boshlanishiga juda oz vaqt qolgani sabab terma jamoamiz azolari mashg'ulotlarni mehmonxonaning o'zida olib borishmoqda. Bosh murabbiy muhim janglarga oz vaqt qolgani uchun sportchilarga yuklamani kamaytirgan. Yigit va qizlarimizda kayfiyat yaxshi. 

"Bu safargi musobaqada tashkiliy jihatlar o'zgacha, avvallari suratchilar Osiyo chempionatiga kelmagandi biz bilan", - deyishdi yigitlar. 

Darhaqiqat, bu safargi qita birinchiligi avvalgilaridan yaxshigina farq qilmoqda. Bu safargi chempionatda erkaklar va ayollar o'rtasidagi bahslar bir vaqtda tashkil etilmoqda. Bungacha erkaklar o'rtasidagi Osiyo chempionati alohida, qizlar o'rtasidagi musobaqa alohida mamlakatlarda, boshqa-boshqa vaqtda o'tkazilgan. Murabbiy Lochin Qo'chqorov boshchiligidagi qizlarimiz ham Bangkokdan medallar shodasi bilan qaytishni maqsad qilishgan. 

Mashg'ulotlardan so'ng musobaqa oldidan fikrlarni bilish uchun bokschilarimizning xonalariga chiqdim. Bahodir Jalolov va Isroil Madrimov bilan biroz suhbatlashdik. Orada xonaga qo'ng'iroq bo'ldi. Birinchi qavatda bokschilarimizni ko'rish uchun kimdir kelganligini aytishdi. Birga tushdik. SHu payt qo'lida O'zbekiston bayroqlari, qazi, patir va boshqa mayda-chuda ko'targan Abdurahmon Fozilov boshchiligidagi uch kishidan iborat muxlislar guruhi sportchilarimizni qarshi oldi. Har erda hoziru-nozir Abdurahmon aka sportchilarimizni qo'llab-quvvatlash uchun Tailand poytaxtiga etib kelgan ekanlar. 

"Bangkokka "qurollangan" holda keldik. Nasib qilsa zaldan turib o'zbek bokschilarimizni qo'llab-quvvatlab turamiz. O'zbekcha muxlislikni Osiyo ringlari ham ko'rib qo'ysin. Imkon darajasida Tailanddagi vatandoshlarimizni to'playapmiz", - dedi Abdurahmon Fozilov. 

Kechka tomon muhim tadbirlardan biri - qura tashlash marosimi tashkil etildi. Unda O'zbekiston boks federaciyasi mutasaddilari, terma jamoamiz murabbiylari ham ishtirok etishdi. 

Tadbir aynan bokschilarimiz istiqomat qilayotgan mehmonxonaning o'zida bo'lib o'tdi. Qura tashlash avtomatik tarzda, kompyuter yordamida amalga oshirildi. Yani, sportchilar reytingiga qarab ajratilmadi. Bu bir tomondan qiziq. Ammo, dastlabki bosqichdayoq kuchli raqiblar o'zaro to'qnash keladigan holatlar ham kuzatildi. Jumladan, -69 kg vazn toifasidagi bokschimiz Bobousmon Baturov dastlabki bosqichdayoq mo'g'ulistonlik kuchli raqibga qarshi to'qnash keladigan bo'ldi. Keyingi davralarda ham uni oson bo'lmagan raqiblar kutib turibdi. Mayli, xechqisi yo'q. Biz Bobousmonga ishonamiz, raqibning kim bo'lishi u qadar katta ahamiyatga ega emas. U terma jamoamizning asosiy "qurol"laridan biri hisoblanadi. 

Bugundan janglar start oladi. Hozircha TV translyaciyasi O'zbekistonda amalga oshirilishi bo'yicha kelishuvga erishilmagan. Faqatgina, "UzReport" telekanali yarim finaldan boshlab janglarni namoyish etishni rejalashtirgan. Ungacha esa, muxlislarimiz internet tarmog'i orqali USHBU XABARda berilgan havolalar orqali janglarni tomosha qilishlari mumkin. 

Demak, bugundan boshlaymiz! Yangi rekordlar sari olg'a O'zbekiston! Biz sizga ishonamiz!

Aziz To'xtamurodov, Bangkok shahridan

BIRINCHI KUN

IKKINCHI KUN