Bekzod Abdurahmonov: Parijda bronzani oltinga aylantiraman

Mukofot olganlar orasida erkin kurash bo'yicha O'zbekiston terma jamoasi azosi, Tokio-2020 Olimpiadasining bronza medali sovrindori Bekzod Abdurahmonov ham bor. Sportchilar oilasidan bo'lgan Abdurahmonov «O'zbekiston Respublikasida xizmat ko'rsatgan sportchi» faxriy unvoniga loyiq ko'rildi. 

«Olimpiya o'yinlari boshqa musobaqalar, xususan jahon va qita chempionatlaridan ancha yuqorida turishiga, saviyasi baland ekaniga bevosita o'z ishtirokim natijasida amin bo'ldim», - deydi Abdurahmonov. - «Hurmatli Prezident, shaxsan sizning qo'llab-quvvatlashingiz, pandemiya holatiga qaramay, biz uchun barcha sharoitlarni muhayyo qilib berganingiz sababli Tokioda yaxshi natijalarga erisha oldik deb o'ylayman. Yaponiyada O'zbekiston tarixidagi ikkinchi eng yaxshi natijani ko'rsatdik. Nasib qilsa, Parijda bronza medallarni oltinga aylantiramiz. Olimpiadaning saviya va darajasi, u erdagi harorat men kutganimdan ham yuqori ekan. Har bir sportchi nafaqat o'zi, balki oilasi, yaqinlari, Vatani shanini himoya qilish uchun harakat qiladi. O'z o'rnida men ham butun musobaqa davomida ortimda 34 millionlik xalqim, ota-onam, yaqinlarim, oila azolarim va Sizdek Prezidentim borligini dildan his qilib turdim. Prezidentim va xalqimning ishonchi menga qo'shimcha kuch berdi. Fursatdan foydalanib, biz sportchilarga qaratayotgan etiboringiz uchun minnatdorlik izhor qilaman. Samolyotdan tushishimiz bilan bizga Prezident sovg'asi sifatida uy va mashina berishdi. Buning uchun yana bir bor rahmat aytaman. Aslida men sportchilar oilasidanman. Akam ham sportchi bo'lgan, u hozir mening murabbiyim. Otam ham kurash tushganlar. Bo'lajak rafiqam Nigora Tursunqulova taekvondo sport turidan ikkita Olimpiadada qatnashdi».