Bekzod Abdurahmonov yana bir yoshga ulg'aydi!

Bekzod Abdurahmonov – 1990 yilning 15 mart kuni Toshkent shahrida dunyoga kelgan. Erkin kurash bo'yicha terma jamoa azosi. 2014 yili Toshkentda dunyoning 100 dan oshiq davlatlari ishtirokida o'tkazilgan jahon chempionatining bronza medali sovrindori. 2018 yilda Vengriyaning Budapesht shahri mezbonlik qilgan jahon chempionatida ham bronza medaliga sazovor bo'lgan. Bugungi qahramonimiz XVII hamda XVIII Osiyo o'yinlarida O'zbekiston sport delegaciyasi hisobiga dastlabki oltin medallarni taqdim etgan. 2017 yili Ashxobod shahrida o'tgan yopiq inshootlardagi Osiyo o'yinlarida shoxsupaning eng yuqori pog'onasiga ko'tarilgan.

Abdurahmonov birinchi marta 2015 yili Qatarning Doha shahri mezbonlik qilgan Osiyo chempionatida qita chempioni bo'lgan. O'shanda u vazni 70 kilogrammgacha bo'lgan polvonlar musobaqasida xitoylik Xayvey Ling, yaponiyalik Takafumi Kojima, hindistonlik Parvin Rana, tojikistonlik Zelimxon Yusupov ustidan g'alaba qozonib, Osiyo chempioni bo'lgandi. Bekzod 2017 yilda Hindistonning Eyu-Deli shahrida o'tkazilgan Osiyo chempionatida yana bir bor qitada tengsiz ekanini isbotladi.

Rio-2016 Olimpiadasi ishtirokchisi bo'lgan Bekzod Abdurahmonov yana ko'plab nufuzli xalqaro musobaqalarda shoxsupaga ko'tarilgan. Hamyurtimiz 2018 yil yakunlari bo'yicha Xalqaro mukofot - "Oltin mangust"ga ham loyiq ko'rilgan. "Oltin mangust" ("Zolotoy Mangust", "Golden Mongoose") mukofoti sport sohasidagi "Oskar" hisoblanadi. Mukofot eng yaxshi sportchilar, sport faxriylari, sport rivoji va sog'lom avlod tarbiyasiga o'z hissasini qo'shayotgan biznesmen va siyosatchilarga beriladi.

Fursatdan foydalanib, "SHuhrat" medali sohibi bo'lgan Bekzod Abdurahmonovni bugungi tavallud kuni bilan O'zbekiston sport kurashlari associaciyasi rahbariyati, murabbiylar va sportchilar nomidan muborakbod etamiz. G'alabalar bardavom bo'lsin, Bekzod!