Beruniy tumanidagi BO'SM suzish havzasida rahbariyat maishatbozlik o'tkazganmi?

Jismoniy tarbiya va sport vazirligi Qoraqalpog'iston Respublikasi Beruniy tumani bolalar-o'smirlar sport maktabining suzish havzasi haqida ijtimoiy tarmoqlarda elon qilingan “Davlatga qarashli ilm dargohi suv havzasida rahbariyat tomonidan yarim kechasi maishatbozliklar uyushtirilmoqda. Maishat uchun kelganlar tabiiyki, shifokor tekshiruvidan o'tmay havzada cho'miladi. Ertaga biror kasallik tarqalmasligini kim kafolat beradi? Umuman, davlatga qarashli maktabda maishatbozlik uyushtirish mumkinmi?” degan malumot yuzasidan quyidagilarni malum qiladi.

Murojaatda ko'rsatilgan holat bo'yicha mazkur muassasada Qoraqalpog'iston Respublikasi Jismoniy tarbiya va sport vazirligi, Beruniy tuman prokuraturasi va tuman DSENM sanitariya bo'limi tomonidan O'zbekiston Respublikasi Vazirlar Mahkamasining 2018 yil 3 maydagi 333-sonli qarori bilan tasdiqlangan “Byudjet mablag'lari hisobiga moliyalashtiriladigan basseynlarda shug'ullanish va ulardan foydalanish tartibi to'g'risida”gi Nizom talablari yuzasidan tekshiruv o'tkazildi.

Muassasa rahbariyati yoki xodimlari tomonidan yarim kechasi suzish havzasida maishatbozlik uyushtirish holatlari haqidagi xabarlar o'z isbotini topmadi. Biroq o'rganish jarayonida suzish havzasidan foydalanishda ayrim kamchiliklarga yo'l qo'yilganligi aniqlandi. 

Xususan, yuqoridagi Nizomning 9-bandida “basseynlardan bir marta shug'ullanish istagini bildirgan shaxslar ushbu Nizomning 11-bandida keltirilgan maxsus shaxsiy sport kiyimida, basseynning tibbiy xodimlari ko'rigidan o'tib, belgilangan to'lovni amalga oshirgan holda shug'ullanishi lozimligi, 11-bandida “basseynlarga kirish va undan foydalanish uchun shug'ullanuvchilarning har birida suzish mashg'uloti uchun mo'ljallangan maxsus shaxsiy (suzish uchun sport kiyimi va bosh kiyimi, basseynda foydalanish uchun alohida oyoq kiyimi, suzish ko'z oynagi, sochiq, sovun) buyumlar bo'lishi kerakligi belgilab qo'yilgan.

Muassasa rahbari yuqoridagi talablar to'liq bajarilmasdan turib bir necha nafar voyaga etmagan yoshlarga basseynga kirish va undan foydalanishga ruxsat bergani aniqlandi.

Yuqoridagi kamchiliklarga yo'l qo'ygani uchun Beruniy tumani bolalar-o'smirlar sport maktabiga qarashli suzish havzasi mudiri U.Yuldashev bilan tuzilgan mehnat shartnomasi bekor qilindi.