Billie Jean King kubogi. Koreyaga ham mag'lub bo'ldik, bugun so'nggi o'yinni "rasmiyatchilik" uchun o'tkazamiz

Kecha O'zbekiston ayollar terma jamoasi saralash bahslari doirasidagi to'rtinchi uchrashuvda Koreya Respublikasi ayollar terma jamoasiga qarshi kortga chiqdi.

Ilk yakkalik o'yinida Ominaxon Valixonova WTA tasnifida 640-o'rinni egallab turgan Dabin Kimga 1/6, 1/6 hisobida mag'lub bo'lgan bo'lsa, ikkinchi uchrashuvda Sevil Yuldasheva dunyoning 587-raketkasi Dayon Bekga 2/6, 3/6 hisoblarida imkoniyatni boy berdi. Juftliklar bahsida esa hamyurtlarimiz Maftunabonu Qahramonova va Sabrina Olimjonova hamkorligi koreyaliklar Boyong Jeong hamda Yonvyu Kyu tandemiga qarshilik ko'rsata olishmadi - 4/6, 1/6.

Bugun vakilalarimiz Tailandga qarshi kortga chiqishadi. Ammo endi ushbu uchrashuv shunchaki rasmiyatchilik uchun o'tkaziladi, deyish mumkin, sababi, O'zbekiston ayollar terma jamoasi guruhda so'nggi o'rinni egallagan holda quyiga tushib ketishi oydinlashib ulgurdi.

Turnirning bugungi taqvimi:

O'zbekiston - Tailand
Xitoy - Yaponiya
Hindiston - Koreya Respublikasi.

Uchrashuvlar 10:00 da poytaxtimizdagi Tennisga ixtisoslashgan Olimpiya maktabi xard kortlarida boshlanadi.

Turnir jadvali: