Biologik faol ozuqalar bilan sog'lom turmush tarzi targ'ibotini kuchaytirish mumkin

Markaz ish faoliyatini yanada takomillashtirish esa sportdagi yutuqlarimizni kafolatlovchi muhim omillardan bo'ladi. MOQ va RSTIAM rahbariyati ishtirokida o'tgan yig'ilish ana shu mavzuga bag'ishlandi. Unda MOQ raisi Rustam SHoabdurahmonov va uning birinchi o'rinbosari Ravshan Irmatov, Abdushukur Sadikov boshchiligidagi RSTIAM vakillari va MOQ mutasaddilari ishtirok etishdi.

Suhbatda Rustam SHoabdurahmonov sportchilar uchun yaratiladigan sharoitlarning muhimligi haqida gapirib o'tdi.

“Bazi kunlarda qon tahlillarini topshirish davomida uzundan uzun navbatlar paydo bo'lmoqda. Bu esa noqulayliklar keltirib chiqarmoqda. SHu bois bunday holatlarda zaxira xonalarini ko'rib chiqishni taklif qilamiz. SHuningdek, atletlarimizga beriladigan qo'shimcha biologik faol ozuqalar tarkibini doim nazorat qilish kerak. Ushbu vositalarni xarid qilishda sportga yaqin sohalar bilan hamkorlik qilish masalasini ham ko'rib chiqaylik. Ulardan yurtimiz aholisi orasida sog'lom turmush tarzini yanada keng targ'ib qilish maqsadida foydalanish mumkin. Turizm va sport vazirligi bilan chuqur hamkorlikni davom ettiramiz. Hukumatimiz bunday g'oyalarimizni qo'llab-quvvatlashiga ishonamiz”, – dedi MOQ rahbari.

Yig'ilish davomida Tokio-2020 Olimpiya o'yinlarida delegaciyamiz uchun ishlatiladigan dori vositalarining tarkibi, ularning miqdori ko'rib chiqildi. MOQ rahbariyati tomonidan soha mutaxassislariga Olimpiada mobaynida delegaciya vakillarining salomatligini nazorat qilish bo'yicha o'z rejalarini ishlab chiqish, markaz faoliyatini yanada takomillashtirish bo'yicha topshiriqlar berildi.