Bokschimiz WBC kamari uchun qozog'istonlik raqibiga qarshi ringga chiqadi + POSTER

CHarm qo'lqop ustamiz Abdurasul Ismoilov (11-3-1, 7 KO) qozog'istonlik bokschi Dulat Bekbauov (2-0-0, 2 KO)ga qarshi WBC Greater Turan mintaqaviy kamari uchun chempionlik jangini o'tkazadi. Ushbu jang 28 mart kuni Qozog'istonning Taraz shahrida bo'lib o'tadi.

"Dulat Bekbauov - Abdurasul Ismoilov — WBC Greater Turan Title kamari uchun. Qozog'iston va O'zbekiston bokschilari o'rtasida WBC kamari uchun 10 raundlik jang bo'lib o'tadi. Sizni chindan ham afsonaviy kamarga loyiq jang kutmoqda", - deyiladi promoushenning Instagramdagi rasmiy sahifasida.

Bekbauovning havaskorlar o'rtasidagi eng yuqori natijasi 2023 yilda Toshkentda bo'lib o'tgan jahon chempionatining kumush medali bo'lgan. SHuningdek, u ikki karra (2022, 2024) Osiyo vice-chempioni hisoblanadi. Qozog'istonlik professional debyutini 2025 yil iyul oyida o'tkazgan va o'sha yilning dekabr oyida Olmaotada hamyurtimiz Hasanboy Mirzahamroevni uchinchi raundda nokautga uchratgandi.

Abdurasul Ismoilov Rossiya, Vetnam, Koreya Respublikasi, Xitoy kabi davlatlarda faol tarzda o'z janglarini o'tkazib kelyapti. Uning so'nggi jangi 2025 yil fevral oyida Moskvada WBA Asia kamari uchun bo'lib o'tgan. Rossiyalik Artur Subxankulovga qarshi kechgan bahs to'liq davom etgan va unda bokschimiz hakamlarning yakdil qarori bilan imkoniyatni boy bergandi.