Bosh egib tazimdamiz, aziz Ustozlar!

Bu dunyoda har qaysi ongli inson – qaerda ishlamasin, qanday kasbu kor, lavozim egasi bo'lmasin, unga bilim va tarbiya berib, hayotga yo'llagan muhtaram o'qituvchi va murabbiylari oldida hamisha qarzdorlik hissi bilan yashaydi. 

Haqiqatan ham, o'zining ko'z nuri, qalb qo'ri, butun borlig'ini bag'ishlab, barchamizga ezgulikdan saboq bergan, otadek mo'tabar, onadek mehribon, aziz ustozlarning hech narsa bilan o'lchab, baholab bo'lmaydigan mashaqqatli va sharafli mehnati uchun har qancha tahsin va tashakkurlar aytsak, arziydi.

Fursatdan foydalanib, bugungi bayram bilan ustozlarimizni, o'qituvchi va murabbiylarni saytimiz ijodkorlari hamda o'quvchilari nomidan chin qalbdan muborakbod etamiz. Barchalariga hurmat-ehtirom va samimiy tilaklarimizni izhor qilamiz. Barcha ustoz va murabbiylarga boshimiz erga tekkunicha tazimdamiz!

 SHogirdlar baxtiga hamisha sog' va omon bo'ling, aziz ustozlar!