Bosh vazir o'rinbosari avtomobilsiz kun akciyasiga qo'shildi

Albatta, shu kun munosabati bilan dunyo ahlini sog'lom turmush tarzini targ'ib qilish, ekologiya va atrof-muhitni asrab-avaylashga davat etiladi.

O'zbekiston Respublikasi Bosh vaziri o'rinbosari, Turizmni rivojlantirish davlat qo'mitasi raisi Aziz Abduhakimov o'zining «Feysbuk» sahifasida bunga munosabat bildirdi:

“Aziz vatandoshlar! 22 sentyabr – Butunjahon avtomobilsiz kuni sifatida dunyoning juda ko'plab davlatlarida keng nishonlanadi. Malumotlarga ko'ra, unda er yuzidagi 1 500 dan ziyod shaharning 100 milliondan ortiq aholisi faol qatnashib keladi.

Avtomobilsiz kun g'oyasi 1995 yilda Buyuk Britaniyada paydo bo'lgan va qisqa muddatda butun dunyoda keng ommalashgan. 2000 yildan beri 22 sentyabr «Butunjahon avtomobilsiz kuni» sifatida nishonlanadi.

SHu kuni avtomobil haydovchilari shaxsiy transport vositalaridan kamida bir kun foydalanishmaydi, bazi shaharlar va mamlakatlarda piyoda yurish, velosiped haydash, jamoat transportidan foydalanish, shuningdek, ish va dam olish joylariga piyoda borish g'oyalarini targ'ib qiluvchi maxsus akciyalar ham tashkil qilinadi.

Bunday tadbirlarni o'tkazishdan ko'zlangan asosiy maqsad, eng avvalo avtomobillardan chiqayotgan turli zaharli gazlar orqali atmosferaning zaharlanishini kamaytirishga o'z hissasini qo'shish, qolaversa piyoda yurish va velosipedda sayr qilishni keng targ'ib etishdan iborat. Bu esa aholi orasida sog'lom turmush tarzini keng ommalashtirish yo'lida xizmat qiladi.

Men ham sizlarni ushbu xayrli tashabbusni qo'llab-quvvatlab, shu kunni avtomobilsiz o'tkazishga harakat qilishga chorlab qolaman!”