Bugun final. SHahram G'iyosov ushbu bosqichga qay tarzda etib keldi?

SHu munosabat bilan, SHahramning avvalgi bosqichdagi raqiblari haqida malumotlar berib o'tishga qaror qildik.

Eslatib o'tamiz, G'iyosov Olimpiada licenziyasini shu yili Xitoyda bo'lib o'tgan Olimpiada saralash turniri finalida g'olib bo'lib, qo'lga kiritgan.

U Riodagi ilk jangini ispaniyalik Yuba Sissokoga qarshi o'tkazdi. 1/16 final doirasida bo'lib o'tgan ushbu jangda yurtdoshimiz raqibiga imkoniyat qoldirmadi va 3:0 hisobida g'alaba qozondi.

1/8 finalda esa bokschimizga litvalik Eymantas Staniosis raqiblik qildi. O'zining aniq zarbalari evaziga ushbu raqibini ortda qoldirgan SHahram...

CHorak finalda Olimpiada chempioni hisoblangan kubalik Roniel Iglesiasga to'qnash keldi. Barcha Olimpiada sovrindoriga qarshi bo'lib o'tgan jangda kubalik sportchining imkoniyatlarini juda yuqori baholagandi. Ammo, buxorolik bokschimiz barcha taxminlarni chippakka chiqardi va ushbu jangda ham g'alabali yurishini davom ettirib, yarim final yo'llanmasini qo'lga kiritdi.

Yarim finaldagi raqib ham anoyilardan emasdi. G'iyosov oldida amaldagi jahon chempioni - marokashlik Muhammad Rabii turardi. Hamyurtimiz juda qiyin bo'lgan raqibini ham 3:0 hisobida mag'lubiyatga uchratib, final chiptasini naqd qilib qo'ydi.

Endi uni finalda qozog'istonlik Daniyam Eleussinov kutib turibdi. Ushbu sportchi haqida biroz avvalroq malumot berib o'tdik. Ko'rinib turibdiki, Daniyar ham juda jiddiy raqib. Ammo, SHahramga endi farqi yo'q. Olimpiada va jahon chempionlarini mag'lub etgan bokschimiz bugun ham muvaffaqiyat qozonishiga ishonamiz!

G'iyosovga huddi jamoadoshi Hasanboy Do'stmatov kabi Olimpiada oltin medalini qo'lga kiritib, yurtimizga yorug' yuz bilan qaytishini tilab qolamiz! Olg'a, SHahram! Olg'a, O'zbekiston!

Bugun ham SHahramning Ronalducha sakrashini bir ko'ramiz. Nima dedingiz? Qarshiliklar yo'qmi?

Aziz To'xtamurodov