Bugun “Humo Arena”da Toshkent Gran-Prisi start oladi

Dunyoning 73 davlatidan 400 nafardan ziyod polvonlar ishtirok etadigan va sovrin jamg'armasi 100 ming AQSH dollarini tashkil etuvchi musobaqaga jahon dzyudo hamjamiyati tomonidan bo'lgan qiziqish juda ham yuqori. 

Birinchi galda Toshkent Gran-prisi dzyudo vatani Yaponiyada o'tkazilgan kattalar o'rtasidagi Jahon chempionatidan keyingi musobaqa hisoblanadi. Aynan 25 avgustdan 2 sentyabrgacha oraliqda o'tgan jahon chempionatida Olimpiadaning muhim reyting ochkolarini jamg'ara olmagan dzyudochilarning aksariyati kemtikni to'ldirish uchun ham Toshkentga kelishgan.   

Toshkent Gran-prisi g'oliblari 700 reyting ochkosini qo'lga kiritishadi. Kumush medal egalari 490, bronza medali bilan taqdirlangan dzyudochilar esa 350 ochkoga ega bo'lishadi. SHuningdek, 5-o'ringa 252, 7-pog'onadan joy olganlarga 182 ochko taqdim etiladi. 

Xalqaro dzyudo federaciyasi (IJF) qoidalariga muvofiq mezbon davlat musobaqada har bir vazn toifasida to'rt nafardan dzyudochi bilan ishtirok etish huquqiga ega. Tabiiyki, O'zbekiston terma jamoasi murabbiylari ham bu imkoniyatdan foydalanishadi. Tajribali sportchilar bilan birga istedodli yoshlarga ham o'zlarini ko'rsatish uchun imkoniyat taqdim etiladi. 

Toshkent Gran-prisida yurtimiz sharfini jami 48 nafar dzyudochimiz himoya qiladi. Ulardan 28 nafari erkak, 20 nafari ayol sportchilardir. 

Erkaklar: -60, -66, -73, -81, -90, -100, +100 kg

Ayollar: -48, -52, -57, -63, -70, -78, +78 kg 

20-22 sentyabr kunlari o'tkaziladigan bahslar soat 10:30dan boshlanadi. Har kuni soat 17:00dan medallar uchun kechadigan final bellashuvlariga start beriladi.