Bugun "Olimpiya kuni". O'zbekistonda ushbu bayram qachon nishonlanishi malum qilindi

Asrlar osha do'stlik, halollik, beg'arazlik ruhini saqlab kelayotgan Olimpiya o'yinlarini o'tkazish g'oyasi ham inson tafakkuri ijodiga mansubdir. Bundan roppa-rosa 125 yil avval baron Per de Kuberten boshchiligida Olimpiadani tiklash uchun eng katta qadam qo'yildi, yani 1894 yilning 23 iyun kuni Xalqaro Olimpiya qo'mitasi (XOQ)ga asos solindi.

Butun dunyoda Olimpiya harakatini boshqarish hamda o'yinlarni tashkil qilish va o'tkazish maqsadida 1894 yil 23 iyunda Xalqaro Olimpiya qo'mitasi (XOQ) tasis etiladi. Uning tarkibiga dastlab 12 davlatdan 14 vakil kiritiladi. Ayni paytga kelib, XOQga dunyoning 206 mamlakati azo. SHu jumladan, O'zbekiston ham.

Ushbu kun har yili katta shodiyona bilan nishonlanadi. Jumladan, 2019 yilgi “Olimpiya kuni” uchun ham o'zgacha tadbirlar rejalashtirilib, Lozannada bo'lib o'tgan mazkur dasturlarda O'zbekiston Milliy olimpiya qo'mitasi Bosh kotibi Jasur Matchanov ham ishtirok etmoqda. Etiborlisi, bu yilgi “Olimpiya kuni” XOQ uchun yangi ofisning ochilishi bilan tarixda qoldi.

Foydalanishga topshirilgan yangi bino dunyodagi eng yirik 3 ta ekologik sertifikatni qo'lga kiritgan. Bino atrofi, uning qurilishi uchun ishlatilgan materiallar, ofis ichidagi jihozlar noyob va ekologik jihatdan eng toza hom-ashyolardan tayyorlangan.

Bugun Lozannada (XOQ shtab-kvartirasi joylashgan shahar) bo'lib o'tgan bayramda XOQ prezidenti Tomas Bax va tashkilotning boshqa azolari, SHveycariya konfederaciyasi prezidenti Uli Maurer, barcha Milliy olimpiya qo'mitalarining rahbariyati vakillari, 30 dan ortiq Olimpiada sovrindorlaridan iborat 700 dan ziyod mehmon ishtirok etdi. Tadbirda ishtirok etgan barcha sport yulduzlarining taassurotlari ulkan. Jumladan, bir necha oy avval yurtimizga tashrif buyurgan rossiyalik taniqli engil atletikachi Elena Isinbaeva, norvegiyalik biatlonchi Ule-Eyner Byorndalen kabi afsonalar ham o'z xursandchiligini bildirib o'tishdi.

Bayram dasturining asosiy qismida 2018 yilda o'tkazilgan Pxyonchxandagi qishki va Buenos-Ayresdagi yozgi o'smirlar Olimpiadasida erishilgan yutuqlar, Olimpizm harakatining targ'iboti sarhisob qilinib, 2020 yili Lozannaning o'zida bo'lib o'tadigan qishki o'smirlar Olimpiadasi va Tokio mezbonligida o'tadigan navbatdagi yozgi Olimpiya o'yinlariga ko'rilayotgan tayyorgarliklar bo'yicha taqdimotlar namoyish qilindi.

Bugungi kunga kelib “Olimpiya kuni” dunyoda eng ommaviy tarzda nishonlanadigan sport bayramlaridan biriga aylangan. Har yili Xalqaro olimpiya qo'mitasiga azo 206 davlatda o'tkaziladigan sport va salomatlik bayramida millionlab insonlar bevosita ishtirok etishmoqda. Ushbu tadbirni o'tkazishdan ko'zlangan asosiy maqsad – aholi orasida sog'lom turmush tarzini hamda olimpizm g'oyalarini keng targ'ib etish, katta-yu, kichik qalbida jismoniy tarbiya va sportga bo'lgan mexrni yanada yuksaltirishdan iborat.

O'zbekiston Milliy olimpiya qo'mitasi 27 yildirki Xalqaro olimpiya qo'mitasi tashabbusini qo'llab – quvvatlagan xolda, mamlakatimizda “Olimpiya kuni”ni keng nishonlab kelyapti. MOQ bu yil ham ushbu tadbirni sportimiz tarixida ilk bor Umummilliy xalq sayli tariqasida o'tkazishni niyat qilgan. Ananaga ko'ra, mamlakatlar ushbu bayramni o'zlari uchun qulay kunda nishonlashlari mumkin. Bu yilgi «Olimpiya kuni» O'zbekistonda 6 iyul sanasiga belgilangan bo'lib, bu kunni sportimiz tarixida ilk bor Umummilliy xalq sayli tarzida katta shodiyona bilan tashkil qilish rejalashtirilgan.