Buyuk Britaniyada boks bo'yicha "Yilning eng yaxshilari" aniqlandi

Superog'ir vazn toifasi WBO yo'nalishida yangi jahon chempioni Fabio Uordli "Yil bokschisi" mukofotiga sazovor bo'ldi. Konor Ben va Kris Yubank o'rtasida 2025 yil aprel oyida bo'lib o'tgan birinchi jang Buyuk Britaniya boksida "Yil jangi" deb topildi.

31 yoshli Uordli o'tgan yili Jastis Xanini nokautga uchratgan. Keyin esa WBO vaqtinchalik chempioni Jozef Parkerni nokaut evaziga engib, mutlaq jahon chempioni Aleksandr Usikdan vakant qolgan WBO kamarining to'laqonli egasiga aylangandi. 

Ukrainalik Usik ham Britaniya boksni nazorat qilish kengashining mukofotiga sazovor bo'ldi. U 2025 yilning eng yaxshi xorijlik bokschisi deb topildi. Yozda u "Uembli" stadionida britaniyalik Daniel Dyubuani nokautga uchratdi va ikkinchi marta superog'ir vazn toifasida mutlaq jahon chempioniga aylandi.

Britaniyalik 21 yoshli superog'ir vazn toifasidagi bokschi Mozes Itauma jurnalistlar tomonidan "Yilning eng yaxshi yosh bokschisi" deb topildi.

Buyuk Britaniyada yilning eng yaxshi murabbiyi Ben Deyvison bo'ldi, u boshqa bir necha bokschilardan tashqari Uordli va Itaumaga ham ustozlik qiladi.

Birinchi yarim o'rta vazn toifasida sobiq mutlaq jahon chempioni, o'tgan yili faoliyatini yakunlagan Josh Teylor esa "Alohida xizmatlari uchun" mukofotiga sazovor bo'ldi.

SHuningdek, birinchi yarim o'rta vazn toifasida yangi WBC chempioni Dalton Smit, murabbiy Nayjel Trevis va 1909 yildan beri nashr etiladigan boks jurnali Boxing News muharrirlari ham mukofotlarga sazovor bo'ldi.