CHiroqchida Xotira va qadrlash kuniga tadbirlar o'tkazildi

Jumladan, Qashqadaryo viloyat jismoniy tarbiya va sport boshqarmasi tasarrufidagi CHiroqchi tuman jismoniy tarbiya va sport bo'limi hamda  tuman 1-sonli bolalar-o'smirlar sport maktabi jamoalari ham, urush qatnashchilari, front ortida mehnat qilgan bobo-buvilarimizning xonadonlarida bo'lib, bayram bilan samimiy qutlashdi. 

SHu tumanda tug'ilib voyaga etgan, umrini sportga, xususan milliy sport turlarimizdan bo'lgan kurashga bag'shida etgan, o'nlab Osiyo hamda jahon chempionati g'olib va sovrindorlarini tayyorlagan, hali hamon o'zining kurash klubida o'g'il-qizlarga uztozlik qilib kelayotgan 80 yoshli Abdurashid polvon Mirzaevning xonadoniga tashrif buyurib, esdalik sovg'alari topshirishdi. 

Bunday etirofdan shodlangan polvon bobo hali yana uzoq yillar qishloq bolalarini sportga jalb etib, mamlakat terma jamoalari safini munosib nomzodlar bilan boyitib borishni bot-bot takidladi. 

SHuningdek, 9 may - Xotira va qadrlash kuni munosabati bilan CHiroqchi tuman 1-sonli bolalar-o'smirlar sport maktabida futbol bo'yicha tuman yoshlari o'rtasida xotira turniri ham tashkil etildi. 

Mazkur xotira turniri ushbu BO'SMda faoliyat ko'rsatgan, yoshlarni jismoniy tarbiya va sportga, xususan bolalar futbolini rivojlantirishda fidoyilik bilan mehnat qilgan, BO'SMning o'quv ishlari bo'yicha direktor o'rinbosari sifatida faoliyat ko'rsatgan To'lqin Ismoilovning yorqin xotirasi uchun o'tkazildi. 

Tuman jismoniy tarbiya va sport bo'limi hamda 1-sonli bolalar-o'smirlar sport maktabi tashabbusi bilan o'tkazilgan mazkur xotira turnirida dastlab, sport bo'limi, BO'SM jamoasi va sportchi o'quvchilar T. Ismoilov xonadonida tashrif buyurishdi, yaqinlariga hamdardlik tilashib, esdalik sovg'alari ulashishdi. Futbol maydonida tadbir oldidan o'tganlar xotirasi uchun Quron tilovat qilinib, duoga qo'l ochishdi. 

SHundan so'ng 200 nafarga yaqin bolalar o'n ikkita  jamoaga bo'linib, g'oliblik uchun to'p surishdi. Keskin va murosasiz bahslar yakunida birinchi o'rinni tumandagi 1-umumiy o'rta talim maktabi jamoasi egalladi. Ikkinchi o'rin 37-maktab o'quvchilariga nasib etgan bo'lsa, uchinchi o'rinni 28-maktab o'quvchilari qo'lga kiritishdi.     

Bellashuvlar yakuniga etgach, tuman jismoniy tarbiya va sport bo'limi, 1-BO'SM tomonidan g'olib va sovrindor jamoalarga, marhumning oila azolari va yaqinlariga esdalik sovg'alari topshirildi.

Ilhom RAHMONOV, o'z muxbirimiz