Davlat Bobonov: Menga Prezidentim va xalqimning ishonchi kuch berdi

 Mukofot olganlar orasida dzyudo bo'yicha O'zbekiston terma jamoasi azosi, Tokio-2020 Olimpiadasining bronza medali sovrindori Davlat Bobonov ham bor. Navoiy viloyati o'g'loni «O'zbekiston Respublikasida xizmat ko'rsatgan sportchi» faxriy unvoniga loyiq ko'rildi. 

«Olimpiya o'yinlari boshqa musobaqalar, xususan jahon va qita chempionatlaridan ancha yuqorida turishiga, saviyasi baland ekaniga bevosita o'z ishtirokim natijasida amin bo'ldim», - deydi Bobonov. - «Olimpiadagacha shu yilning o'zida Qirg'izistonda o'tkazilgan Osiyo chempionatida oltin, Vengriyadagi jahon chempionatida kumush medallarni qo'lga kiritgandim. Bu ikki yutuq menga Olimpiadada yanada kuch berishiga ishongandim. Ammo, musobaqa saviya va darajasi, u erdagi harorat men kutganimdan ham yuqori ekan. Har bir sportchi nafaqat o'zi, balki oilasi, yaqinlari, Vatani shanini himoya qilish uchun harakat qiladi. O'z o'rnida men ham butun musobaqa davomida ortimda 34 millionlik xalqim, ota-onam, yaqinlarim, oila azolarim va Sizdek Prezidentim borligini dildan his qilib turdim. Prezidentim va xalqimning ishonchi menga qo'shimcha kuch berdi. Fursatdan foydalanib, biz sportchilarga qaratayotgan etiboringiz uchun minnatdorlik izhor qilaman. Samolyotdan tushishimiz bilan bizga Prezident sovg'asi sifatida uy va mashina berishdi. Buning uchun yana bir bor rahmat aytaman. Bu bizga yana motivaciya beradi va nasib qilsa, Parij-2024 Olimpiadasida oltin medallar bilan qaytamiz. SHaxsan o'zim shu yuqori minbardan turib Parijdan chempion sifatida kelishimga vada beraman».