Davlat Bobonov va Muzaffarbek To'raboevdan yoshlar uchun unutilmas mahorat sabog'i + FOTOREPORTAJ

Tokio-2020 va Parij-2024 Olimpiya o'yinlarining sovrindorlari, jahon chempionlari Davlat Bobonov va Muzaffarbek To'raboev jizzaxlik yosh dzyudochilar uchun aynan mamlakat chempionatida o'tgan muhtasham arenada master klass, yani mahorat saboqlarini o'tkazib berishdi. 

Tatamida sportimiz yulduzlari bilan o'tkazilgan mashg'ulot bolalarning bir umr yodida qoladigan bo'ldi. Albatta, ular o'zlari havas qilgan dzyudochilar bilan elkama-elka turib shug'ullanishdi. Katta yo'l boshida turgan yosh dzyudochilarimiz uchun bu haqiqiy bayram bo'ldi. 

Mashg'ulot yakunida dzyudo to'garagi tarbiyalanuvchilari o'zlarini qiziqtirgan savollarga javob olishdi. Bobonov va To'raboev Olimpiya shohsupasigacha bosib o'tilgan murakkab yo'l haqida so'zlab berishdi. 

Tadbir so'nggida ikki avlod vakillari esdalik uchun suratga tushishdi. Fotosessiya oldidan esa dzyudochilarga sovg'alar ulashildi.