Devis Kubogi. O'zbekiston va AQSH o'z tarkiblarini elon qilishdi + POSTER

Ushbu bahs terma jamoalar o'rtasida norasmiy jahon chempionati hisoblangan Devis Kubogining jahon ligasiga saralash bosqichi doirasida o'tkaziladi. G'olib jamoalar sentyabr oyida o'tkaziladigan Devis Kubogining final bosqichiga yo'l oladi. 

Uchrashuvning ilk kunida ikkita yakkalik bahsi, ikkinchi kunida esa bitta juftlik va ikkita yakkalik bahsi o'tkaziladi. Mazkur so'nggi saralash bosqichida 24 ta terma jamoa 12 ta yo'llanma uchun kurash olib boradi.

Ikkala terma jamoa murabbiylari tomonidan tarkiblar elon qilindi. Mamlakatimizning ikkinchi raketkasi Denis Istomin sardor sifatida tennischilarimizni kortga boshlab tushadi. Tarkibdan shuningdek, Sergey Fomin, Humoyun Sultonov va Sanjar Fayziev joy olgan. 

AQSH terma jamoasi safida Toshkentga Tommi Paul, Jenson Bruksbi, Makdonald Makkenzi, Rajiv Ram va Ostin Kraychik keladi. 

Taqqoslash uchun, Fomin ATP reytingida 362, Istomin 468, Sultonov 489, Fayziev 1178-pog'onani egallab turibdi. Tommi Pol 32, Bruksbi 48, Makdonald 63-o'rindan joy olgan. Juftlik bahslarida ishtirok etuvchi Rajiv Ram juftliklar reytingida 3, Kraychik esa 10-o'rinni band etgan.