Diyorbek O'rozboev: "Medalimni Davlatimiz mustaqilligining 25 yilligiga bag'ishlayman"

Og'irlik vazni 60 kg.gacha bo'lgan polvonlar bellashuvida tatamiga tushgan istedodli sportchimiz Avstraliya, SHveycariya, Braziliya hamda Gruziya terma jamoasi azolarini mag'lub etib, bronza medali sovrindori bo'ldi.

“Birinchilardan bo'lib bahslarga kirishish juda ham masuliyatli. Men bunga ham jismonan, ham ruhan tayyor edim. Biz sportchilarga Davlatimiz va xukumatimiz tomonidan qaratilayotgan alohida etibor o'z so'zini aytmoqda. Odatda sportchilar mana shunday g'alabalarni biror-bir sana yohud yaqinlaridan biriga bag'ishlaydilar. Men Olimpiya o'yinlaridagi birinchi medalimni Davlatimiz mustaqilligining 25 yilligiga bag'ishlayman. Xalqimiz, Prezidentimiz ishonchlarini oqlaganligimdan xursandman. Fursatdan foydalanib meni doimo qo'llab-quvvatlab turadigan oilamga, ustozlarimga ham o'z minnatdorchiligimni bildirmoqchiman. Bu barchamizning yutug'imizdir”, - deydi Diyorbek O'rozboev.

SHu tariqa, mamlakatimiz Istiqlolga erishgandan buyon yozgi Olimpiya o'yinlarida sportchilarimiz tomonidan qo'lga kiritilgan medallar soni 21taga etdi. SHundan 5 tasi (ikkita kumush va uchta bronza) dzyudo ustalarimizga tegishlidir.

Albatta, Olimpiya o'yinlarining birinchi kunidayoq sovrindor bo'lgan davlatlar safidan o'rin egallash har qancha tahsinga loyiq. Umid qilamizki, Diyorbekning zafarli odimi Olimpiya o'yinlariga kelgan qolgan sportchilarimizga ham yuqori kayfiyat bag'ishlaydi va qo'lga kiritilajak medallarimiz soni kundan-kunga ortib boraveradi. Bu yo'lda yurtdoshlarimizga omad va zafarlar tilab qolamiz.

Malumot uchun. Diyorbek O'rozboev 1993 yilning 17 avgust kuni Xorazm viloyatining SHovot tumanida tavallud topgan. Xalqaro toifadagi sport ustasi. Murabbiylari: Jamshid Xudoyberganov va Vyacheslav Pereteyko.