Dzambolat Tedeev: "Jahon chempionatining o'tkazilishi - to'g'ri qaror!

Terma jamoa bosh murabbiyi Dzambolat Tedeev shu haqida intervyu berdi.

— Jahon chempionatining shu yilning o'zidayoq o'tkazilishi to'g'ri qaror, — deya so'z boshladi Tedeev. – Sportchilar qaysi musobaqaga tayyorgarlik ko'rayotganini bilishi, hamisha sport formasida bo'lishi lozim. Lekin dunyoda hukm surayotgan  nostabil holat bu yil loaqal bitta xalqaro musobaqa o'tkaziladimi degan savolni javobsiz qoldirmoqda. Sir emas, ayrim davlatlarda COVID-19 ikkinchi to'lqini boshlandi. SHunga qaramay, biz dekabr oyida Serbiyaning Belgrad shahrida o'tkazilishi rejalashtirilayotgan jahon chempionatiga tayyorgarlik ko'rishda davom etamiz. Kurashchilarning musobaqalarsiz tayyorgarligi xalqaro restartdan keyingi turnirlarda salbiy tomondan o'z tasirini o'tkazadi. Bundan hech kim qochib qutula olmaydi.   

— Terma jamoaning birinchi yig'ini qachon o'tkaziladi?

— Iyul oyining oxirlarida sportchilar chuqurlashtirilgan tibbiy ko'rikdan o'tishadi. Avgustning boshlarida Moskva viloyatining Novogorsk shaharchasi yoki tog'li Kabardino-Balkariyadagi bazada yig'ilamiz. Ayni paytda markazlashgan o'quv-mashg'ulot yig'inini o'tkazish mushkul. Rossiyalik sportchilar uch oydan oshiqroq vaqt davomida karantin holatida o'tirishdi. Hozir mavjud sport bazalari turli sport turlari bo'yicha terma jamoalar bilan to'lgan.

— Hozir siz murabbiylik qilayotgan kurashchilar nima bilan band?

— Har kuni sportchilar va ularning shaxsiy murabbiylari bilan gaplashyapmiz. Deyarli barcha kurashchilar uy sharoitida mashg'ulotlarni o'tkazishyapti. Bu faqat jismoniy holatni ushlab turish uchun etadi. Bizning sportda kuchli raqiblar bilan o'tkaziladigan sparringlar muhim ahamiyatga ega. Agar sparring mashg'ulotlar bo'lmasa, shug'ullanmadim deb hisoblayverish kerak. Individual shug'ullanish hech qachon jamoaviy tarzda mashg'ulot o'tkazishning o'rnini bosa olmaydi.  

— Yil yakuniga qadar ichki musobaqalar o'tkazilishini rejaga kiritilganmi?

— Belgraddagi jahon chempionati oldidan Rossiya chempionati o'tkazilishi shart. Aynan shu musobaqa orqali Serbiyaga kim borishini aniqlab olamiz. Katta ehtimol bilan Rossiya chempionati sentyabr oyida o'tkaziladi.