Dzyudo bo'yicha jahon chempionatining aralash jamoaviy bahslarida medal uchun kurashadiganlar malum, Yaponiyada mag'lubiyat

Saralashning ilk bosqichida Turkmaniston terma jamoasini 4:0 hisobida mag'lub etgan dzyudochilarimiz 1/4 finalda Yaponiyaga qarshi bahs olib borishdi. Umida Nig'matova Mao Araini, Nurbek Murtazoev Goki Tajimani mag'lubiyatga uchratib, terma jamoamizni 2:0 hisobida oldinga olib chiqishdi. Afsuski, dzyudo vatani vakillari kambek amalga oshirib, ketma-ket 4 ta bellashuvni o'z foydalariga hal qilishdi. 

Yaponiya yarim finalga yo'l oldi, O'zbeksiton esa bronza medali uchun kurashni davom ettirish huquqiga ega bo'ldi. Lekin medal ilinjidagi so'nggi urinish ham omadsiz yakun topdi. Italiya terma jamoasi murosasiz kechgan bahsda 4:3 hisobida g'alaba qozonib, kichik finalga chiqdi. 

Biroz kutilmaganda Yaponiya terma jamoasi 1/2 finalda Gruziyaga 2:4 hisobida imkoniyatni boy berib qo'ydi. Ikkinchi 1/2 finalda Koreya Respublikasi terma jamoasi Germaniya dzyudochilariga hech qanday imkoniyat qoldirmadi - 4:0. Endi kechki dasturda bronza medallari uchun  Italiya - Germaniya, Braziliya - Yaponiya juftliklari o'zaro bahs olib boradi. CHempionlik masalasi Gruziya va Koreya Respublikasi terma jamoalari bahsida hal bo'ladi.