30 avg 17:42
Yangiliklar

Dzyudo

Dzyudo yulduzlari ishtirokidagi onlayn musobaqa g'oliblari malum

Bugun O'zbekiston Respublikasi mustaqilligining 29 yilligiga bag'ishlangan onlayn musobaqa o'tkazildi.

O'zbekiston dzyudo federaciyasi tomonidan tashkil etilgan musobaqada terma jamoamizning yulduzli tarkibi bilan birga ikkinchi va uchinchi raqamli dzyudochilar g'oliblik yo'lida o'zaro bahs olib borishdi. Dzyudo boshqa yakkakurash sport turlari singari ikki kurashchining gilamdagi bellashuvidan iboratligi uchun hakamlarimiz bugungi onlayn musobaqaga maxsus mashqlar to'plamini taqdim etishdi. Dzyudochilarimiz avvaliga otjimaniya, keyin esa turnikda kimonoga osilgan holda mashq bajarishdi. Ana shu mashqlar asosida hakamlarimiz g'olib va sovrindorlar nomini aniqlab berishdi.

Onlayn turnirni O'zbekiston Milliy olimpiya qo'mitasi bosh kotibi Oybek Kasimov kirish so'zi bilan ochib berdi. Oybek Omilovich so'zi yakunida ishtirokchilarni yaqinlashib kelayotgan Mustaqillik bayrami bilan qutlab, onlayn musobaqada omad tiladi. O'zbekiston Milliy olimpiya qo'mitasi prezidenti Rustam SHoabdurahmonov esa karantin paytida o'tkazilayotgan ushbu musobaqalarning ahamiyatiga to'xtaldi:

"Qadrli ishtirokchilar, murabbiylar, hakamlar, bunday musobaqalar juda ham muhim hisoblanadi. Hozir butun dunyoda bir xil vaziyat hukmron. Sportchilar bir xil sharoitda mashg'ulot o'tkazishga majbur bo'lishyapti. Bu kabi onlayn turnirlarning o'tkazilishi esa ayni muddao bo'lyapti. Xabaringiz bor, shu kunlarda poytaxtimizda og'ir atletika bo'yicha Mustaqillik kubogi birinchi xalqaro turniri o'tkazilmoqda. Unda 32 davlat atletlari onlayn tarzda musobaqada qatnashishyapti. Natijalar shuni ko'rsatyaptiki, boshqa davlat sportchilari pandemiya davrida qo'l qovushtirib o'tirganlari yo'q. Ular hatto 15-20 kilogrammga o'z natijalarini yaxshilab olganliklariga guvoh bo'ldik. Aytmoqchi bo'lganim, hech kim to'xtab qolgani yo'q, aksincha hamma harakatda, intilishda. Biz ham shunga yarasha tayyorgarligimizni olib borishimiz kerak. Aziz Yakubjanovich tomonidan dzyudochilar uchun hamma sharoitlar muhayyo qilinmoqda. Ilias Iliadis boshchiligidagi yulduzli tarkibga ega murabbiylar shtabimiz bor. Hech qaysi bir sport turida bu kabi salohiyatli murabbiylar shtabi jam bo'lmagan. Bundan foydalanish kerak. Bugun kattalar o'rtasida onlayn musobaqa o'tkazyapsizlar, ertaga o'smirlar va yoshlar ishtirokida ham shunday turnirlarni tashkil etish lozim. Fursatdan foydalanib, barcha ishtirokchilarga omad va zafar tilayman. O'zingizni extiyot qiling!".

SHundan so'ng musobaqa bosh hakami, xalqaro toifadagi IJF referisi Ramziddin Saidov ishtirokchilarni qoidalar va shartlar bilan tanishtirdi. Mashqning soniga emas, to'g'ri va to'liq bajarilishiga etibor qaratilishini urg'uladi.

Ikki soatdan oshiqroq vaqt mobaynida o'tkazilgan onlayn musobaqa murosasiz kechganligini etirof etish joiz. Ayniqsa, o'g'il bolalar o'rtasida turnikda bajarilgan musobaqa keskinligi bilan ajralib turdi. Fikrimizni qayd etilgan natijalar ham tasdiqlaydi. Mashq yakunida bir yo'la uch nafar ishtirokchi bir xil natija ko'rsatdi. Muhriddin Tilovov, SHahram Ahadov va Davlat Bobonov turnikda 40 tadan tortilishdi. Natijada bu uch dzyudochimiz o'zaro bahsda g'olibni aniqlab berishdi. Ikkinchi urinishda Tilovov yana 40, Ahadov 41, Bobonov esa 27 bor turnikda tortildi. Hakamlar qarori bilan ikkinchi imkoniyatdan foydalangan Kamoliddin Rasulovning natijasi 35 tani tashkil qildi.

Hakamlar kengashining uzoq davom etgan munozaralaridan so'ng SHahram Ahadovning oxirgi harakatlarida mashqni to'liq bajarmaganlik holati aniqlanib, g'olib sifatida Muhriddin Tilovov elon qilindi. SHunday bo'lsa-da, SHahram "otjimaniya" musobaqasida mutlaq g'olib bo'ldi. Qizlar o'rtasida Sita Qadamboeva hamda Diyora Keldiyorova mos ravishda "otjimaniya" va turnikda tortilish musobaqasi g'olibasiga aylanishdi.